ბიზნესმენ ბესო ხარძიანის მკვლელობის საქმეზე პროკურატურის მიერ დღეს გაკეთებულ განცხადებაში, ოჯახის წევრებისთვის ახალი არაფერი ყოფილა. ამის შესახებ ადვოკატი მალხაზ სალაყაია ჟურნალისტებთან საუბრობს.
მისი განმარტებით, პროკურატურის მიერ ის პირები არიან დასახელებული, რომელიც თავიდანვე გაცხადდა ოჯახის წევრებთან.
,,ყველა ის საგამოძიებო-ოპერატიული ღონისძიება, რომელიც იქნა გატარებული აღნიშნული დანაშაულის გახსნასთან დაკავშირებით, სწორედ ამ ხნის განმავლობაში ეს მტკიცებულებები იკრიბებოდა და დღეს ჩათვალა მიზანშეწონილად პროკურატურამ, ეს განცხადება გაეკეთებინა“, - განაცხადა ხარძიანის ოჯახის ადვოკატმა.
რაც შეეხება მკვლელობის მოტივსა და შემკვეთს, ადვოკატი ამბობს, რომ ამაზე პროკურატურა დღეს ვერაფერს იტყოდა, რადგან საგამოძიებო უწყება ამ მიმართულებით მუშაობას დღესაც აგრძელებს.
„დამკვეთზე და მოტივზე პროკურატურა დღეს ვერ იტყოდა, საგამოძიებო უწყება აგრძელებს აღნიშნულ სისხლის სამართლის საქმეზე ყველა მიმართულებით მუშაობას და ამ მიმართულებით საგამოძიებო მოქმედებასაც“,- განაცხადა სალაყაიამ.
შეგახსენებთ, პროკურატურამ დღეს ბესიკ ხარძიანის მკვლელობის საქმე გახსნილად გამოაცხადა. ხარძიანის მკვლელობაში მხილებული არიან უკრაინის მოქალაქე, 31 წლის ოლეკსანდრ დამეტოვი და რუსეთის ფედერაციის მოქალაქე, 43 წლის ოლეგ დოევი.
