27-ჯერ საგზაო წესის დარღვევის შემთხვევაში მძღოლი მართვის მოწმობას დაკარგავს, - ცვლილება შედის "საგზაო მოძრაობის შესახებ" კანონსა და "ადმინისტრაციულ სამართალდარღვევათა კოდექსში". ცვლილლებათა პროექტი პარლამენტის დარგობრივი ეკონომიკისა და ეკონომიკური პოლიტიკის კომიტეტს შინაგან საქმეთა მინისტრის მოადგილემ შალვა ხუციშვილმა გააცნო.
ხუციშვილის ინფორმაციით, 100 ქულა თითოეულ მართვის მოწმობას მიენიჭება. ქულების გამოკლების პრინციპი ისეა შედგენილი, რომ თითოეულ მძღოლს საშუალება აქვს, მოძრაობის წესები დაარღვიოს.
”ვინც 27-ჯერ დაარღვევს, ისინი დაკარგავენ მართვის მოწმობას და გამოცდის ჩაბარება ხელახლა დასჭირდებათ, რათა კიდევ ერთხელ დაადასტურონ, რომ ისინი ნამდვილად იცნობენ წესებს და მათი მხრიდან წესების დარღვევა არ იყო უპასუხისმგებლობის ან არცოდნის შედეგი”, - განაცხადა ხუციშვილმა და აღნიშნა, რომ 1-ელ იანვარს ყველა ქულა განულდება და მძღოლს 100 ქულა თავიდან დაერიცხება.
