ე.წ. შეწყალების საქმეზე და პოლიტპატიმართა სიასთან დაკავშირებული გამოძიებები სავარაუდოდ გაერთიანდება, - ამის შესახებ არასამთავრობო ორგანიზაცია ,,სამართალდამცველთა რეფორმირების ცენტრის“ ხელმძღვანელმა ზვიად კუპრავამ მთავარ პროკურატურაში დაკითხვის შემდეგ განაცხადა.
"გამომძიებელმა გიორგი მუჯირმა თქვა, რომ სავარაუდოდ ჩვენი და ალეკო ელისაშვილის განცხადებების საფუძველზე დაწყებული გამოძიებები გაერთიანდება", - განაცხადა კუპრავამ. მისივე თქმით, გამოძიებას ინფორმაცია მიაწოდა პოლიტპატიმართა სიაში შეტანილ იმ პირებთან დაკავშირებით, რომლების სტატუსის განსაზღვრა საეჭვოდ მიაჩნია.
,,საუბარია ასეულობით ნარკოდანაშაულისთვის ბრალდებული პირის გათავისუფლებაზე. პოლიტპატიმართა სიაში ეს პირები მოხვდნენ კომისიის დასკვნის საფუძველზე, რომლის მიხედვით მათ ნარკოტიკი ჩაუდეს. რატომ არ გამოიძიეს იყო თუ არა ჩადებული ნარკოტიკული საშუალება მათთვის, სწორედ ამის გამოძიება უნდა მოხდეს", - განაცხადა კუპრავამ.
მისი თქმით, ხუთმა არასამთავრობო ორგანიზაციამ პროკურატურაში საჩივარი ბესელიას, კობახიძის, ტურავას, გვენეტაძის და პოლიტპატიმართა სიის შემდგენი კომისიის სხვა წევრების მიმართ შეიტანა.
