საქარველოს ეროვნული გვარდია 25 წლისაა. ეროვნული გვარდიის პირად შემადგენლობას და ვეტერან გვარდიელებს იუბილე საქართველოს სამხედრო ძალების უმაღლესმა მთავარსარდალმა, პრეზიდენტმა გიორგი მარგველაშვილმა; თავდაცვის მინისტრმა თინათინ ხიდაშელმა და გენერალური შტაბის უფროსმა, გენერალ-მაიორმა ვახტანგ კაპანაძემ მიულოცეს.
„25 წლის წინ დაარსდა ქართული გვარდია, რომელმაც უმნიშვნელოვანესი როლი შეასრულა მაშინ, როდესაც საქართველო იქმნებოდა, როგორც თანამედროვე ახალი სახელმწიფო. მაშინ, როდესაც საბჭოთა კავშირიდან გამოსვლის პროცესში ჩვენ უნდა ჩამოგვეყალიბებინა სახელმწიფოებრიობა. თქვენ და თქვენი თანამებრძოლები იდექით უმნიშვნელოვანეს სადარაჯოზე, რომ შექმნილიყო დამოუკიდებელი საქართველო“,- მიმართა გვარდიელებს საქართველოს პრეზიდენტმა.
თავდაცვის მინისტრმა თინათინ ხიდაშელმა კი ეროვნულ გვარდიაში დაგეგმილ სიახლეებზე გაამახვილა ყურადღება.
„თქვენ იცით, რომ ჩვენ ვმუშაობთ ეროვნული გვარდიის კონცეფციაზე, რომელსაც 2016 წლის დასაწყისში წარვუდგენთ საზოგადოებას და მისი ერთ-ერთი მთავარი მიმართულებაა, გაიზარდოს სამაშველო ოპერაციების დროს გვარდიის შესაძლებლობები, როგორც ფუნქციურად, სამართლებრივად, ასევე ტექნიკურადაც. ეროვნული გვარდია, ჩემი აზრით, უფრო მობილური უნდა იყოს, სამართლებრივად. საგანგებო მდგომარეობის დროს დამატებითი ბარიერების და პროცედურების გავლა არ უნდა აფერხებდეს პრობლემის მოგვარებას. ამიტომ ვცდილობთ, რომ რაც შეიძლება გავამარტივოთ ეს რეჟიმი. ვნახოთ, ეს არ არის მხოლოდ თავდაცვის სამინისტროს გადასაწყვეტი, ჩვენ კონცეფციას დავდებთ. დარწმუნებული ვარ, პრეზიდენტისა და მთავრობის მხრიდან მივიღებთ თანხმობას“,- განაცხადა საქართველოს თავდაცვის მინისტრმა.
ეროვნული გვარდიის სამწყობრო მოედანზე შეკრებილ სამხედრო მოსამსახურეებს სიტყვით ასევე მიმართა საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ.
„მინდა ვისარგებლო შემთხვევით და ყველა გვარდიელს, მოქმედს და ვეტერანს, მივულოცო დღევანდელი დღე. ვუსურვო წარმატება და დიდხანს სიცოცხლე. მინდა, გავიხსენო ჩვენი გარდაცვლილი გვარდიელები. ქართული გვარდიელობა არის გულის და სინდისის მოთხოვნა. შესაბამისად, ძალიან დიდი პასუხისმგებლობაა დიდ პატივთან ერთად. გვარდია და რეზერვი, ზოგადად, სამობილიზაციო სისტემის შემადგენელი ნაწილია და ვმუშაობთ ამ სისტემის გაუმჯობესებაზე, რომელიც უნდა იყოს მოქნილი, მისადაგებული დღევანდელ გამოწვევებთან და ქვეყნის რესურსებთან.
ჩვენი აზრით, გვარდიის შესაძლებლობები მაქსიმალურად უნდა გამოიყენებოდეს ბუნებრივი კატასტროფებისა და კატასტროფის შედეგების ლიკვიდაციის პროცესში. ეს ფუნქცია მათ სამხედრო ამოცანებთან ერთად უნდა ჰქონდეთ“, - აღნიშნა გენერალ-მაიორმა ვახტანგ კაპანაძემ.
გვარდიის 25 წლის იუბილესთან დაკავშირებით დღესვე დაჯილდოების ცერემონიალი გაიმართა. საქართველოს პრეზიდენტის ბრძანებულებით ვახტანგ გორგასლის მესამე ხარისხის ორდენებით ეროვნული გვარდიის მეთაური, ბრიგადის გენერალი ლევან გამყრელიძე და დასავლეთ სარდლობის მეთაური, პოლკოვნიკი მიხეილ სადუნიშვილი დაჯილდოვდნენ. მედლით „მხედრული მამაცობისთვის“ დაჯილდოვდა ეროვნული გვარდიის შტაბის უფროსი, პოლკოვნიკი იოსებ მაისურაძე. დღესვე ღირსების ორდენები გადაეცათ: გიორგი თავდგირიძეს, დავით აფციაურს, ალექსი მინდაძეს და დავით ბეჟაშვილს. საზეიმო ცერემონიალს დაესწრო საქართველოს უშიშროების საბჭოს მდივანი ირინე იმერლიშვილი, საქართველოს თავდაცვის მინისტრის მოადგილე ანა დოლიძე და შეიარაღებული ძალების მაღალჩინოსანი სამხედრო მოსამსახურეები.
საზეიმო ცერემონიალზე მამა მიქაელმა საქართველოს შეიარაღებული ძალების ეროვნული გვარდიის საბრძოლო დროშა აკურთხა და პირადი შემადგენლობა დალოცა.
საზეიმო ცერემონიალის დასასრულს კი სპეციალური ფილმის ჩვენება მოეწყო გვარდიის შესახებ, გაიჭრა საზეიმო ტორტიც.
ეროვნული გვარდია 1990 წლის 20 დეკემბერს შეიქმნა. ის იყო პირველი სამხედრო ფორმირება, რომლის ბაზაზეც ქართული შეიარაღებული ძალები ჩამოყალიბდა და განვითარდა. XX საუკუნის 90-იან წლებში საქართველოს ერთიანობისთვის წარმოებულ ბრძოლებში ეროვნული გვარდია ქართული შეიარაღებული ძალების ძირითად ბირთვს წარმოადგენდა.
