საქართველოს თავდაცვის მინისტრმა სამხედრო დაზვერვის 24 წლის იუბილე თადარიგის ვიცე-პოლკოვნიკს, სამხედრო მზვერავ თენგიზ ელაშვილს პირადად მიულოცა. თინათინ ხიდაშელმა ვიცე-პოლკოვნიკს სიგელი გადასცა და სამშობლოს წინაშე დამსახურებისთვის მადლობა გადაუხადა.
„დღეს სამხედრო დაზვერვის დღეა და გვსურდა, განსაკუთრებული დამსახურების მქონე ვეტერანი ოფიცრისთვის მიგველოცა ეს დღე. სიმბოლურად, მადლობის წერილი გადავეცით იმ სამსახურისთვის, იმ შრომისთვის, რომელიც მან ახალგაზრდების აღზრდაში ჩადო... ყოველთვის ძალიან სასიამოვნოა, როდესაც ამ ასაკში გრძნობ პატივისცემას და დამსახურებისთვის მადლობას გეუბნებიან“, - განაცხადა თინათინ ხიდაშელმა.
თადარიგის ვიცე-პოლკოვნიკს პროფესიული დღე ასევე მიულოცა სამხედრო დაზვერვის დეპარტამენტის უფროსმა ზვიად ჩხაიძემ.
1991 წლის 18 ნოემბერს თავდაცვის სამინისტროს შემადგენლობაში შეიქმნა და ფუნქციონირება დაიწყო შეიარაღებული ძალების მთავარი შტაბის სადაზვერვო სამმართველომ. სამხედრო დაზვერვის შემადგენლობა სხვა სამანევრო ქვედანაყოფებთან ერთად აქტიურად არის ჩართული უსაფრთხოების მხარდამჭერ საერთაშორისო მისიებში, თანამშრომლობს საქართველოსა და პარტნიორი ქვეყნების სადაზვერვო სამსახურებთან და რეგიონული და საერთაშორისო სტაბილურობის გამყარების მიზნით მნიშვნელოვან ღონისძიებებს ახორციელებს.
