საცხოვრებელი ბინით დაკმაყოფილდება ყველა სამხედრო მოსამსახურე, რომელმაც თავდაცვის სამინისტროსთან შესაბამისი ხელშეკრულება გააფორმა, - ამის შესახებ თავდაცვის სამინისტროს განცხადებაშია ნათქვამი.
სამინისტრო ოფიცრის წოდების მქონე სამხედრო მოსამსახურეების კონტრაქტებთან დაკავშირებულ საკითხს განცხადებით ეხმაურება და განმარტავს, რომ უწყებამ 2007 წლის 19 მარტის #135 ბრძანების საფუძველზე, ოფიცრის წოდების მქონე სამხედროებთან კონტრაქტი გააფორმა და მათი საცხოვრებელი ბინებით უზრუნველყოფის ვალდებულება აიღო.
განცხადების თანახმად, სამინისტრო აღნიშნული ბინების გადაცემის საკითხზე აქტიურად მუშაობს. ბინების ეტაპობრივად გადაცემა მიმდინარე წლიდან დაიწყება და 2018 წლის ბოლომდე დასრულდება.
„თავდაცვის სამინისტრო ცალსახად აცხადებს, რომ საცხოვრებელი ბინით აუცილებლად დაკმაყოფილდება უკლებლივ ყველა სამხედრო მოსამსახურე, რომელმაც თავდაცვის სამინისტროსთან შესაბამისი ხელშეკრულება გააფორმა და გათვალისწინებული ვალდებულებები შეასრულა“, - ნათქვამია განცხადებაში.
უწყების ინფორმაციით, მომავალი წლის ბოლომდე, საცხოვრებელი ბინით 700 კონტრაქტორი სამხედრო მოსამსახურე დაკმაყოფილდება.
