შიდა აუდიტის ტრენინგი დასრულდა. დღეს ფინანსთა სამინისტროს აკადემიაში კურსის დახურვის საზეიმო ცერემონიალი გაიმართა. ტრენინგის მონაწილეებს სერთიფიკატები საქართველოს თავდაცვის სამინისტროს შიდა აუდიტის დეპარტამენტის უფროსმა, ნინო ქარაზანაშვილმა, ფინანსთა მინისტრის მოადგილემ, ცოტნე ყავლაშვილმა და გაერთიანებული სამეფოს სამხედრო ატაშემ საქართველოში, ვიცე-პოლკოვნიკმა ნიკ უილკესმა გადასცეს. მათ მსმენელებს კურსის წარმატებით დასრულება მიულოცეს და შიდა აუდიტორთა უწყვეტი პროფესიული განვითარების მნიშვნელობაზე გაამახვილეს ყურადღება.
ტრენინგში თავდაცვის სამინისტროსა და კიდევ ცხრა სამინისტროს შიდა აუდიტორებმა მიიღეს მონაწილეობა. სემინარს ფინანსთა სამინისტროს სახელმწიფო შიდა კონტროლის დეპარტამენტის წარმომადგენლებიც დაესწრნენ. ქართველი შიდა აუდიტორებისთვის ტრენინგი დიდი ბრიტანეთის თავდაცვის სამინისტროს შიდა აუდიტის დეპარტამენტის მიერ შერჩეულმა ინსტრუქტორმა, ჯონ ჩეშერმა ჩაატარა.
კურსის ფარგლებში მონაწილეები შესყიდვების, ადამიანური რესურსების, ინფორმაციისა და კორპორაციული მართვის, ასევე თაღლითობის რისკის აუდიტის საკითხებს გაეცნენ.
ტრენინგი საქართველოს თავდაცვის სამინისტროს ინიციატივით, დიდი ბრიტანეთის საელჩოს, ნატო-საქართველოს პროფესიული განვითარების პროგრამასა (PDP) და საქართველოს ფინანსთა სამინისტროს თანაორგანიზებით გაიმართა.
სასწავლო კურსი ევროკავშირის ასოცირების დღის წესრიგით განსაზღვრულ რეფორმას - სახელმწიფო შიდა ფინანსური კონტროლის განხორციელებას ითვალისწინებს; მიზნად ისახავს საჯარო სექტორში ფუნქციურად ძლიერი შიდა აუდიტის სამსახურების ჩამოყალიბებასა და მათი საქმიანობის საერთაშორისო სტანდარტებთან შესაბამისობის უზრუნველყოფას.
სახელმწიფო შიდა ფინანსური კონტროლის რეფორმის ფარგლებში შიდა აუდიტის პროფესიულ ზრდაზე ზრუნვა საქართველოს ფინანსთა სამინისტრომ 2012 წლიდან დაიწყო. საქართველოს თავდაცვის სამინისტროში შიდა აუდიტი შედარებით ახალი ფუნქციაა და მისი სრულყოფილად ამოქმედება უწყების პრიორიტეტს წარმოადგენს, რაც მას რესურსების ეფექტიან მართვაში დაეხმარება.
