თუ ნატომ საქართველოში განიცადა კრახი, ეს იქნება კრახი ძალიან ბევრი მიმართულებით, - ამის შესახებ საქართველოს თავდაცვის მინისტრმა დღეს "თბილისში რუმსში" მიმდინარე საერთაშორისო კონფერენციაზე განაცხადა. თინა ხიდაშელის განცხადებით, ის მხარს უჭერს მონტენეგროს გაწევრიანებას ნატოში, თუმცა სვამს კითხვას - რატომ მონტენეგრო და არა საქართველო?
"საქართველოში თუ ნატო-მ კრახი განიცადა, ეს იქნება კრახი ძალიან ბევრი მიმართულებით. თუ ნატო გამოიჩენს სიფრთხილეს რუსეთის მიმართ, ამით მას გზას გაუხსნის, ვინაიდან ძალიან ბევრი ძალა, ძალიან ბევრი ადამიანი, ელოდება რომ ნატო გაჩერდება და დაფრთხება. სწორედ ამაზე პასუხი უნდა იყოს ვარშავის სამიტი. დღეს ჩვენ მოვისმინეთ, რომ თუ დღეს რომელიმე ქვეყანა იმსახურებს ნატო-ს წევრობაზე მიწვევას, ეს არის მონტენეგრო. მე სრულად ვუჭერ მხარს მათ გაწევრიანებას. მაგრამ მთავარი შეკითხვა, ფუნდამენტური შეკითხვა, რაც მაქვს, არის ის, რატომ მონტენეგრო, სადაც მოსახლეობის ერთ მესამედზე ნაკლები არის ალიანსში გაწევრიანების მომხრე და არა საქართველო, სადაც ორ მესამედზე მეტი უჭერს მხარს ნატოში ინტეგრაციას. რატომ არ ვართ ჩვენ შესაფერისები, გვესმის, რომ არის გარკვეული ცინიზმი ამ კითხვაში, მაგრამ ეს არის გამოწვევა, რომელსაც ჩვენ ვიღებთ და ყველაფერს გავაკეთებთ, რათა ყველა კედელი დავანგრიოთ და ყველა დავარწმუნოთ, რომ თუკი რამე უნდა მოხდეს ვარშავაში, ეს სწორედ ნატოს გაფართოებაა, - განაცხადა თინა ხიდაშელმა.
