თავდაცვის მინისტრი ამერიკის შეერთებულ შტატებში გავლენიან კვლევით ორგანიზაციებს სტუმრობს. აშშ-ის თავდაცვის მდივანთან, ეშტონ კარტერთან შეხვედრის შემდეგ, თინათინ ხიდაშელი ატლანტიკურ საბჭოსა და ჰერიტიჯის ფონდში იმყოფებოდა. შეხვედრებზე ორგანიზაციის მკვლევარებთან და მოწვეულ ექსპერტებთან საუბრის მთავარი თემა საქართველოს უსაფრთხოების გარემო, რეგიონში არსებული გამოწვევები და რუსეთთან ურთიერთობების პერსპექტივები იყო.
თავდაცვის მინისტრის განცხადებით, მსგავსი ფორმატის შეხვედრები საკუთარი არგუმენტების სიმყარის მოსინჯვისა და კვალიფიციური რჩევების მიღების შესაძლებლობას იძლევა.
„ატლანტიკურ საბჭოში და ჰერიტიჯის ფონდში გამართულ შეხვედრებზე ჩვენ ვიმყოფებოდით მეგობრების გარემოცვაში და ეს არის ძალიან მნიშვნელოვანი. ვისაუბრეთ გლობალური მასშტაბით ტერორიზმის წინააღმდეგ მიმართულ ღონისძიებებში საქართველოს მონაწილეობაზე და ბუნებრივია, რუსეთზე. მთავარი აქცენტი ამ შეხვედრების ფარგლებში გაკეთდა იმაზე, რომ რაც შეიძლება მეტად შეგვაიარაღონ მყარი არგუმენტებით, გეგმით, სტრატეგიით, რომლითაც უნდა მოქმედებდეს საქართველო რუსეთიდან მომავალი საფრთხეების წინააღმდეგ. ვთხოვეთ, რომ მათ ფასილიტაცია გაუწიონ ჩვენს გზავნილებს, მოთხოვნილებებს და საქართველოს უსაფრთხოების გარემოს უზრუნველყოფისთვის აუცილებელ არგუმენტებს ამერიკის შეერთებულ შტატებში გადაწყვეტილებების მიმღებებთან“, - განაცხადა თინათინ ხიდაშელმა.
თავდაცვის მინისტრი აშშ-ში სამუშაო ვიზიტს განაგრძობს. თინათინ ხიდაშელი უახლოეს დღეებში რამდენიმე გავლენიან კვლევით ორგანიზაციას ესტუმრება, დაგეგმილია თავდაცვის მინიტრის საჯარო გამოსვლებიც.
