ხვალ, 26 ივნისს თბილისის საქალაქო სასამართლოში ე. წ ”კაბელების საქმეზე” პროცესი გაიმართება. სხდომა 11:00 საათზეა ჩანიშნული.
19 ივნისს გამართულ პროცესზე კი თბილისის საქალაქო სასამართლომ ე. წ ”კაბელების საქმეზე” ბრალდებულები პირადი თავდებობის საფუძველზე სასამართლო სხდომის დარბაზიდან გაათავისუფლა.
ბრალდებულებს გიორგი ლობჟანიძეს, არჩილ ალავიძეს, დავით წიფურიას, გიზო ღლონტსა და ნუგზარ კაიშაურს საქართველოს პარლამენტის წევრები, მინისტრები და საზოგადოებისთვის ცნობილი სახეები თავდებში ჩაუდგნენ.
შესაბამისად, არ დაკმაყოფილდა ბრალდების მხარის შუამდგომლობა, მათთვის აღკვეთის ღონისძიების სახედ გამოყენებული პატიმრობის, გირაოთი - თითოეულისათვის 10-10 ათასი ლარის ოდენობით შეცვლის თაობაზე.
სხდომაზე ასევე ნაწილობრივ დაკმაყოფილდა დაცვის მხარის შუამდგომლობა, რომლებიც ბრალდებულების აღკვეთის ღონისძიების გარეშე დატოვებას ან სასამართლოს შეხედულებისამებრ, პირადი თავდებობის გამოყენებას ითხოვდნენ.
შეგახსენებთ, რომ თავდაცვის სამინისტროს ყოფილ თანამშრომლებს გამოძიება 4 მილიონ ლარზე მეტი თანხის გაფლანგვის ედავება.
