ნატო-საქართველოს ერთობლივი საწვრთნელი ცენტრი ვაზიანში, სავარაუდოდ, წლის ბოლოსთვის გაიხსნება, - ამის შესახებ საქართველოს შეიარაღებული ძალების გენერალური შტაბის უფროსმა ვახტანგ კაპანაძემ დღეს, ჟურნალისტებთან განაცხადა.
მისი თქმით, საქართველო ამ საკითხთან მიმართებაში, არამარტო მიყვება გეგმას, არამედ აჭარბებს კიდეც მას.
"საწვრთნელი ცენტრის მიმართულებით ნატო-სთან ძალიან აქტიურად ვთანამშრომლობთ. მე ვერ ვხედავ რაიმე ხელისშემშლელ პირობას, რომ რაც შეიძლება ჩქარა არ დავიწყოთ აღნიშნულის განხორციელება. უკვე გამოყოფილია ოფისი საქართველოს თავდაცვის სამინისტროში, სადაც დაჯდება ის ჯგუფი, რომელიც იმუშავებს ამ მიმართულებით. შერჩეულია პიროვნებები, რომლებიც საბოლოო ფორმას მისცემენ სამუშაო ჯგუფის შემადგენლობას. თავისთავად შერჩეულია ადგილი და ჩვენ არამარტო მივყვებით გეგმას, არამედ ვაჭარბებთ კიდეც მას", - განაცხადა კაპანაძემ.
მისი მტკიცებით, ეს იქნება ერთ-ერთი ყველაზე წარმატებული პროექტი საქართველოსა და ნატო-ს თანამშრომლობაში.
