თავდაცვის მინისტრი თინა ხიდაშელი იმედოვნებს, რომ ალიანსის წევრები დანაპირებს შეასრულებენ და ვარშავის სამიტზე საქართველო სასურველ შედეგს მიიღებს. ამის შესახებ მინისტრმა დღეს, „ექსპო-ჯორჯიაში“ ნატოს სტრატეგიული სამხედრო პარტნიორობის კონფერენციაზე სიტყვით გამოსვლისას განაცხადა.
მან ყურადღება გაამახვილა უსაფრთხოების გამოწვევებზე, პარტნიორობის მნიშვნელობასა და საქართველოს ნატოში გაწევრიანების პერსპექტივებზე.
„სერიოზული უსაფრთხოების გამოწვევების ფონზე მეამაყება, რომ საქართველო დღეს ნატოს ყველაზე თავსებადი, სანდო და ერთგული პარტნიორია. სირთულეებმა ჩვენ კიდევ უფრო გაგვაძლიერა რათა უფრო წარმატებით განვახორციელოთ თავდაცვის ტრანსფორმაციის პროცესი, განვავითაროთ შესაძლებლობები, მეტი ყურადღება დავუთმოთ წვრთნასა და განათლებას და უფრო მეტად თავსებადები გავხდეთ ნატოსთან. დარწმუნებული ვარ ეს მიგვიყვანს ჩვენს საბოლოო მიზნამდე - ნატოში გაწევრიანებამდე. იმედს ვიტოვებ, რომ ვარშავის სამიტზე სასურველ შედეგს მივიღებთ და ალიანსის წევრებიც დანაპირებს შეასრულებენ“ - განაცხადა თავდაცვის მინისტრმა.
დღეს, „ექსპო-ჯორჯიაში“ ნატოს სტრატეგიული სამხედრო პარტნიორობის კონფერენცია გაიხნა. ყოველწლიურ სამხედრო ფორუმში მონაწილეობას ნატოს წევრი და პარტნიორი ქვეყნების შეიარაღებული ძალების მაღალჩინოსნები და ექსპერტები იღებენ. ორი დღის განმავლობაში კონფერენციის მონაწილეები ტრანსფორმაციის საკითხებსა და ნატოს წევრი და პარტნიორი ქვეყნების სამომავლო გამოწვევებს განიხილავენ.
კონფერენციის პლენარული სესია საქართველოს თავდაცვის მინისტრმა თინათინ ხიდაშელმა გახსნა. ფორუმის მონაწილეებს ვიდეო მიმართვის საშუალებით მიესალმა ნატოს გენერალური მდივნის მოადგილე ალექსანდერ ვერშბოუ. სიტყვით გამოვიდნენ ნატოს ტრანსფორმაციის გაერთიანებული ძალების სარდალი, საფრანგეთის საჰაერო ძალების გენერალი ჟან-პოლ პალომეროსი და ნატოს გაერთიანებული სახმელეთო ძალების სარდლის მოადგილე, გენერალ-ლეიტენანტი ედვარდ დავისი.
ოფიციალური გახსნის შემდეგ პლენარული სესია სხვადასხვა თემატიკის პანელებით გაგრძელდა. კონფერენციის მეორე დღეს მონაწილეები სინდიკატებში იმუშავებენ.
ყოველწლიური კონფერენცია მნიშვნელოვანი ფორუმია, სადაც ნატოს წევრი და პარტნიორი ქვეყნების გენერალური შტაბების უფროსებს შესაძლებლობა აქვთ ერთმანეთს სტრატეგიულ საკითხებზე სამომავლო ხედვა გაუზიარონ. კონფერენციის მიზანია ხელი შეუწყოს ტრანსატლანტიკური თანამეგობრობის ქვეყნებში ტრანსფორმაციის შესახებ აზრთა გაზიარებასა და ერთიანი ხედვის ჩამოყალიბებას. კონფერენციის თანამასპინძლები არიან ნატოს ტრანსფორმაციის გაერთიანებული სარდლობა და საქართველოს შეიარაღებული ძალები.
