"თავისუფალი დემოკრატების" ლიდერის, ირაკლი ალასანიას განცხადებით, საკანონმდებლო ორგანოში ფრთხილადაა განსასაზღვრი თუ რა კატეგორიის დანაშაულს შეეხება სისხლის სამართლის კოდექსში განსახორციელებელი ცვლილებები რომლიც საქართველოს მოქალაქეების უცხო ქვეყნის უკანონო შეიარაღებულ ფორმირებაში მონაწილეოებაზე დასჯას გულისხმობს.
,,ბუნებრივია ძალიან ფაქიზად და ფრთხილად არის თვითონ პარლამენტში განსასაზღვრი რას და რა კატეგორიის დანაშაულს შეეხება ეს და აქედან გამომდინარე ჩვენი წარმომადგენლები პარლამენტში, კონკრეტულად ბატონი შალვა შავგულიძე ძალიან აქტიურად იქნება ამ ინიციატივის განხილვაში ჩართული"", -განაცხადა ირაკლი ალასანიამ.
იუსტიციის მინისტრის თეა წულუკიანის განცხადებით, საქართველოს მოქალაქეების საზღვარგარეთ უკანონო ფორმირებაში მონაწილეობა, წვრთნა ან მოწოდება თავისუფლების აღკვეთით დასჯადი ქმედება იქნება.
,,კერძოდ, სისხლის სამართლის კოდექსში შედის ახალი მუხლი, 312-ე პრიმა მუხლი, სადაც წერია, რომ უკანონო ფორმირებაში საზღვარგარეთ მონაწილეობა ან ამგვარი მონაწილეობისთვის წვრთნა ან მოწოდება იქნება დასჯადი თავისუფლების აღკვეთით. თუ ჩვენი მოქალაქე მონაწილეობს უკანონო ფორმირებაში, ან აქ გაიწვრთნება, ან მოწოდებას გააკეთებს, გადაიბირებს _ ეს ყველაფერი ხდება დასჯადი სისხლის სამართლის წესით, რადგან არ შეიძლება, სახელმწიფო ამ ტიპის გადინებისადმი ტოლერანტული იყოს. იგივე პრობლემა უფრო დიდი მასშტაბით უდგას გერმანიას, საფრანგეთს. მაგალითად ფრანგი მოქალაქეები ჯალათებად გვევლინებიან, ვინაიდან მიდის ახალგაზრდებისთვის ტვინის რეცხვა, ხდება მისი რელიგიური რადიკალიზაცია და ა.შ.", - განაცხადა წულუკიანმა ,,იმედის" ეთერში.
რაც შეეხება უკრაინაში მებრძოლ საქართველოს მოქალაქეებს, იუსტიციის მინისტრის განმარტებით, მათზე ეს ცვლილება იმ შემთხვევაში გავრცელდება, თუ ისინი უკანონო ფორმირებაში ჩაერთვებიან.
