,, აქ მთავარია ფორმულირება და განზრახვა, რომელიც ამ ფორმულირების უკან შეიძლება გამოიკვეთოს. ასეთიBბუნდოვანი საუბარი უკანონო ფორმირებასთან დაკავშირებით ბევრი კითხვის გამჩენი შეიძლება იყოს. თუ ამ შემთხვევაში საუბარია ტერორისტულ დაჯგუფებებში მონაწილეობაზე ეს ისედაც დასჯადია და ცალკე ნორმატიული აქტით, შეიძლება, კიდევ უფრო გამკაცრდეს, მაგრამ თუ უკანონო შეიარაღებულ ფორმირებებში ვინმეს უნდა იგულისხმოს უკრაინის დასაცავად ქართველ მოქალაქეთა ბრძოლა, ეს ქვეყნის ეროვნული ინტერესებს დააზიანებს", _განაცხადა დარჩიაშვილმა.

დარჩიაშვილის განცხადებით, სასურველია თუ საქართველოს ოკუპანტი ქვეყნის შეიარაღებულ ფორმირებებში სამსახური ასევე დასჯადი ქმედება იქნება.

,,მე ვისურვებდი, რომ პარალელურად განისაზღვროს საქართველოს მიმართ აგრესიის განმახორციელებელი ქვეყნის შეიარაღებულ ფორმირებებში სამსახური სისხლის სამართლებრივად დასჯადი იყო", _განაცხადა ,,ჯი-ეიჩ-ენთან" საუბარში დარჩიაშვილმა.

იუსტიციის მინისტრის თეა წულუკიანის განცხადებით, საქართველოს მოქალაქეების საზღვარგარეთ უკანონო ფორმირებაში მონაწილეობა, წვრთნა ან მოწოდება თავისუფლების აღკვეთით დასჯადი ქმედება იქნება.

,,კერძოდ, სისხლის სამართლის კოდექსში შედის ახალი მუხლი, 312-ე პრიმა მუხლი, სადაც წერია, რომ უკანონო ფორმირებაში საზღვარგარეთ მონაწილეობა ან ამგვარი მონაწილეობისთვის წვრთნა ან მოწოდება იქნება დასჯადი თავისუფლების აღკვეთით. თუ ჩვენი მოქალაქე მონაწილეობს უკანონო ფორმირებაში, ან აქ გაიწვრთნება, ან მოწოდებას გააკეთებს, გადაიბირებს _ ეს ყველაფერი ხდება დასჯადი სისხლის სამართლის წესით, რადგან არ შეიძლება, სახელმწიფო ამ ტიპის გადინებისადმი ტოლერანტული იყოს. იგივე პრობლემა უფრო დიდი მასშტაბით უდგას გერმანიას, საფრანგეთს. მაგალითად ფრანგი მოქალაქეები ჯალათებად გვევლინებიან, ვინაიდან მიდის ახალგაზრდებისთვის ტვინის რეცხვა, ხდება მისი რელიგიური რადიკალიზაცია და ა.შ.", - განაცხადა წულუკიანმა ,,იმედის" ეთერში.

რაც შეეხება უკრაინაში მებრძოლ საქართველოს მოქალაქეებს, იუსტიციის მინისტრის განმარტებით, მათზე ეს ცვლილება იმ შემთხვევაში გავრცელდება, თუ ისინი უკანონო ფორმირებაში ჩაერთვებიან.