სააღმზრდელო წლის მეორე სემესტრი სამგორის რაიონის ხუთ საბავშვო ბაგა-ბაღში ახალი ჯგუფების გახსნით დაიწყო. ექვსი დამატებითი ჯგუფი სამგორის 28-ე, 115-ე, 163-ე, 166-ე 181-ე საბავშვო ბაგა-ბაღებში აუთვისებელი ფართებისა და ამორტიზირებული საცურაო აუზის გარემონტების ხარჯზე მოეწყო. ახალი ჯგუფების დამატების შედეგად 220-მდე პატარამ შეძლო ბაღში დარეგისტრირება და დასაქმდა 30 ადამიანი. ოთახები სრულად აღიჭურვა საჭირო ინვენტარით, ინდივიდუალური სველი წერტილებითა და გასახდელებით, მოეწყო სამზარეულოები.
სამგორის რაიონი ერთ-ერთია, სადაც ყველაზე მწვავე პრობლემა იყო ბავშვების რეგისტრაციისა და ჯგუფების გადატვირთულობის თვალსაზრისით, რის შედეგადაც აღნიშნული პრობლემა ზოგიერთ ბაღში სრულად მოიხსნა.
დამატებითი ჯგუფები თბილისის მერის მოადგილემ ალუდა გოგლიჩიძემ, საბავშვო ბაგა-ბაღების მართვის სააგენტოს ხელმძღვანელმა თემურ თორდინავამ, სამგორის რაიონის გამგებელმა მამუკა ჩოქურმა, საკრებულოს განათლებისა და კულტურის კომისიის თავმჯდომარემ თამარ ტალიაშვილმა და სამგორის მაჟორიტარმა დეპუტატმა გულიკო ზუმბაძემ დაათვალიერეს.
დამატებითი ჯგუფების მოწყობა სხვა რაიონებშიც მიმდინარეობს, და მათი ნაწილი 2015 წლის იანვრის ბოლომდე ეტაპობრივად გაიხსნება.
თბილისის საბავშო ბაგა-ბაღების მართვის სააგენტოს ხელმძღვანელის თემურ თორდინავას განცხადებით, სააღმზრდელო წლის დაწყებამდე, სააგენტოს ახალმა ადმინისტრაციამ შეისწავლა ერთ-ერთი ყველაზე მწვავე პრობლემა და სკოლამდელი აღზრდის მომსახურების მიღების მსურველთა მოთხოვნის მაქსიმალურად დაკმაყოფილებისთვის დაიწყო სხავადასხვა ღონისძიებების განხორციელება, პირველ რიგში გაკეთდა კვლევა, რის შემდეგაც გამოიკვეთა პრობლემური რაიონები აღსაზრდელთა რეგისტრაციის მხრივ და ახალი ჯგუფების გახსნა და ახალი ბაგა-ბაღების მშენებლობა ამ ფაქტორის გათვალისწინებით დაიგეგმა.