პოლიტოლოგი რამაზ საყვარელიძე ,,ჯი-ეიჩ-ენთან" საუბარში აცხადებს, რომ პრემიერ ირაკლი ღარიბაშვილს არ უნდა დაკონკრეტებინა ჟურნალისტის კითხვაზე პასუხი არის თუ არა, რუსეთი საქართველოს მტერი, რადგან მსგავსი ტიპის განცხადებების გაკეთების შემთხვევაში უნდა აიღო იარაღი და ეომო მას.
,,თუ ქვეყანას მტრის სახელს დაარქმევ მაშინ მტერს იარაღით უნდა ებრძოლო.თუ არ გაქვს ამის შესაძლებლობა, მაშინ სჯობია არ თქვა მსგავსი რამ. მაგალითად, ისლამისტური ჯგუფები აშშ-ს მტერს ეძახიან, იარაღს იღბენ და ებრძვიან, რაც ლოგიკურია. Aამიტომ ჯერ გამოცხადო ქვეყანა მტრად, არ ეომო, შემდეგ მოელაპარაკო, ეს არალოგიკურია", _განაცხადა საყვარელიძემ.
კითხვაზე ,,რუსეთს თუ არ სურს საქართველოსთან მეგობრობა მაშინ რა ტაქტიკით უნდა იმოქმედოს ქვეყანამ?_საყვარელიძე პასუხობს:
,,აგერ უკრაინის მიწაზე ომი მიდის, მაგრამ პრეზიდენტი პოროშენკო რუსეთზე არ იძახის მტერიაო. რატომ?-იმიტომ, რომ უკრაინელები ლაპარაკობენ რუსეთთან, ამიტომ სანამ ლაპარაკის სურვილი და შესაძლებლობა არის, იქამდე გზის მოჭრა საერთაშორისო ურთიერთობებში მიღებული არ არის", _განაცხადა საყვარელიძემ ,,ჯი-ეიჩ-ენთან" საუბარში.
პრემიერმა ირაკლი ღარიბაშვილმა "ტაბულას" ჟურნალისტის კითხვაზე - ,,არის თუ არა პუტინი საქართველოსა და უკრაინის საერთო მტერი?" - პასუხი არ გასცა და განმარტა, რომ საქართველოს მტერი არის ექსპრეზიდენტი მიხეილ სააკაშვილი.
პრემიერის განცხადებით, ეს არის პროვოკაციული კითხვა.
,,ჩვენ ვართ პასუხისმგებლიანი მთავრობა და უპასუხისმგებლოდ არ მოვიქცევით ჩვენი ქვეყნის და ჩვენი ხალხის წინაშე. ჩვენი ტერიტორიის 20% არის ოკუპირებული. რუსეთის ჯარი გვიდგას ჩვენს მიწაზე და არის ურთულესი ვითარება რეგიონში. უკრაინა არის ცეცხლის ალში გახვეული და თქვენს ფავორიტ სააკაშვილს ერთი მიზანი აქვს, რომ საქართველოში მოხდეს კონფლიქტი და არეულობა და საქართველო კიდევ შევიდეს შეიარაღებულ დაპირისპირებაში რუსეთთან. ეს არის მტრობა ჩვენი ხალხის და ჩვენ ამას არ დავუშვებთ. ფილოსოფია ის კი არ არის, ვინ უფრო გაბედულად იტყვის, მტერია თუ არა და შეაგინებს, თუ არ შეაგინებს. ჩვენ უნდა ვიყოთ პასუხისმგებელი ჩვენს თითოეულ განცხადებაზე. მე ვარ მთავრობის მეთაური და მე უნდა გავაკეთო განცხადება, რომელიც იქნება კეთილდღეობის მომტანი ჩვენი ხალხისთვის და არა ის, რომელიც უფრო დააზიანებს ჩემს ქვეყანას. თუ თქვენ გასიამოვნოთ ამ განცხადებით, თქვენ და თქვენი ოცკაციანი სექტა?" - განმარტა ღარიბაშვილმა.