პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი იმედს გამოთქვამს, რომ თავდაცვის სამინისტროს დაკავებულ მაღალჩინოსნების სასამართლო გირაოს სანაცვლოდ გაათავისუფლებს.
,,მეც მაქვს სურვილი, რომ სამხედრო მოსამსახურეებს, რომლებიც დღეს წინასწარ პატიმრობაში არიან, გირაო შეუფარდონ. ამასთანავე ვითვალისწინებ იმ გარემოებას, რომ მიმდინარეობს გამოძიება და გამოძიებას თავის ინტერესები აქვს. იმედი მაქვს, მას შემდეგ რაც გამოძიება ძირითად საკითხებს გაივლის, მათ გირაო შეეფარდებათ", -განაცხადა ჟურნალისტებთან სესიაშვილმა.
შეგახსენებთ, რომ თავდაცვის სამინისტროს დაკავეუბლ მაღალჩინოსნებს საზოგადოების ცნობილი სახეები და დეპუტატების ნაწილი თავდებში უდგებიან. როგორც უწყების ყოფილი თანამშრომლების ადვოკატებმა განაცხადეს აღკვეთის ღონისძიების შეცვლის მოთხოვნით შუამდგომლობას სასამართლოში უახლოეს პერიოდში წარადგენენ.
მათივე განმარტებით, დეპუტატებს შორის არიან როგორც ,,რესპუბლიკელები", ასევე "თავისუფალი დემოკრატები" და ,,წეროვნული ფორუმის" წევრები.
საქალაქო სასამართლოს გადაწყვეტილებით, თავდაცვის სამინისტროს 5 თანამშრომელს აღკვეთის ღონისძიებად, 2 თვიანი წინასწარი პატიმრობა შეეფარდა.
დაკავებულებს, გამოძიება სახელმწიფო ბიუჯეტის კუთვნილი 4 102 872 ლარის გაფლანგვის ედავება.
გამოძიების ინფორმაციით, 2013 წელს, თავდაცვის სამინისტროს მიერ ორგანიზებული საიდუმლო სახელმწიფო შესყიდვის მიმდინარეობისას, უპირატესობის „სილქნეტის" მიენიჭა. პროკურატურის განცხადებით, ხელშეკრულებით თავდაცვის სამინისტრომ სს „სილქნეტს" უნდა გადაუხადოს ჯამში 6 720 877.42 ლარი, საიდანაც წინასწარ (ავანსად) გადარიცხულია უკვე 6 480 877.42 ლარი, სანაცვლოდ კი თავდაცვის სამინისტრომ სს „სილქნეტისგან" 2015 წლის 16 იანვარს უნდა მიიღოს ქონება და მომსახურება, რომლის რეალური საბაზრო ღირებულება ექსპერტიზის დასკვნის შესაბამისად შეადგენს მხოლოდ 2 618 004.82 ლარს.