საერთაშორისო ჟიურიმ ევროვიზიის სიმღერის კონკურსისთვის 5 კანდიდატი შეარჩია. წელს პირველად საზოგადოებრივმა მაუწყებელმა ევროვიზიის შიდაშესარჩევ კონკურსზე საერთაშორისო ჟიური მოიწვია, ჟიურის წევრებს მუსიკალურ კონკურსებში, კონკრეტულად კი ევროვიზიის სიმღერის ფესტივალში მონაწილეობის დიდი გამოცდილება აქვთ.
ხუთეული ასე გამოიყურება: მიშა სულუხია, ნინა სუბლატი, ეთერ ბერიაშვილი, ჯგუფი „ნიუტონი" და ედვარდ მეისონი.
სიმღერებს მაყურებელი 31 დეკემბერს პირდაპირ ეთერში მოისმენს; პირველი იანვრიდან კი 14 დღის განმავლობაში პირველი არხის ეთერში ვიდეორგოლები იტრიალებს და მაყურებელს საშუალება ექნება სმს-ების საშუალებით ხმა მისცეს თავის რჩეულს.
14 იანვარს საუკეთესოს საუკეთესოთა შორის მაყურებელთან ერთად, საერთაშორისო ჟიური შეარჩევს.
გულშემატკივრებს შეეძლებათ რჩეულ კონკურსანტს ერთი ნომრიდან დღეში ერთი სმს-ი გამოუგზავნონ, რომლის ღირებულებაც 50 თეთრი იქნება.
ეროვნული კონკურსის გამარჯვებული ავსტრიაში საიუბილეო, რიგით მე-60 ევროვიზიის სიმღერის კონკურსზე საქართველოს წარადგენს.
