იუსტიციის მინისტრი თეა წულუკიანი პოზიტიურად აფასებს ყოფილი მთავარი პროკურატურის არჩილ კბილაშვილის მიერ პროკურატურის რეფორმირებასთან დაკავშირებით გამოთქმულ პოზიციას.
იუსტიციის მინისტრმა ყოფილი მთავარი პროკურორი 27 დეკემბერს დაგეგმილ იმ სხდომაზე მიიწვია სადაც უწყების რეფორმის შესახებ იმსჯელებენ.
,,მიხარია, რომ ყოფილმა მთავარმა პროკურორმა მოისურვა პროკურატურის ორგანოების რეფორმაზე მუშაობა. როგორც იტყვიან, სჯობს გვიან, ვიდრე არასდროს. როცა ის მთავარი პროკურორი იყო, ჩემი გადასახედიდან არასწორ კანონს უჭერდა მხარს, რომელიც მისი ინიციატივით იყო ბევრ ნაწილად მიღებული 2013 წლის მაისში. კარგია, რომ მას რეფორმატორულ პროცესში სურს ჩართვა. ჩვენ მას ვიწვევთ 27 დეკემბერს იმ სხდომაზე, რომელზეც პრემიერის დავალებით, მთავრობა იმუშავებს არასამთავრობოებთან ერთად. მე იმედი მაქვს, რომ ბატონი არჩილი ამ პროცესში მიიღებს მონაწილეობას", - განაცხადა წულუკიანმა
ყოფილი მთავარი პროკურორი არჩილ კბილაშვილი მიიჩნევს, რომ უნდა შეიცვალოს მთავარი პროკურორის როგორც არჩევის, ასევე გადაყენების წესი. ამის შესახებ, ორგანიზაცია „საქართველოს ევროპული არჩევანის" ხელმძღვანელმა არჩილ კბილაშვილმა საკანონმდებლო და აღმასრულებელი ხელისუფლების, ასევე არასამთავრობო ორგანიზაციების წარმომადგენლებს პროკურატურის რეფორმირების პროექტის წარდგენისას განუცხადა.
,,მთავარი პროკურორის დანიშვნაში მონაწილეობა უნდა მიიღოს, ყველა უმაღლესმა სახელმწიფო ორგანომ _საქართველოს მთავრობამ, პრეზიდენტმა და პარლამენტმა. რაც შეეხება მთავარი პროკურორის გათავისუფლებას მისი გათავისუფლება უნდა მოხდეს იმპიჩმენტის პროცედურით, როგორც ეს არის დადგენილი უზენაესი სასამართლოს წევრისთვის. ანუ თუ მან ჩაიდინა დანაშაული დადგინდა ეს უზენაესი სასამართლოს მიერ და პარლამენტმა მხარი დაუჭირა, ან საგამონაკლისო შემთხვევაში პრეზიდენტისა და პარლამენტის გადაწყვეტილებით", _განაცხადა კბილაშვილმა.
