კოალიცია ,,ქართული ოცნების" წევრი ელისო ჩაფიძე უახლოეს პერიოდში თავდაცვის უწყებისგან ახსნა-განმარტებას ელოდება თუ კონკრეტულად რა მიზანს ემსახურებოდა ძალოვანი უწყების განცხადება. დეპუტატი წუხს, რომ განცხადების ავტორები მისი თანაგუნდელები არიან.
,,ჩემთვის გაუგებარი იყო თუ რატომ გაავრცელა თავდაცვის სამინისტრომ ასეთი პოლიტიკური განცხადება. მე ვწუხვარ იმის გამო, რომ ისინი ჩვენი თანაგუნდელები არიან და ძალიან დიდი იმედი მაქვს, რომ ჩვენ უახლოეს მომავალში მოვისმენთ განმარტებას, ვისი ინიციატივა იყო აღნიშნული განცხადების გავრცელება და რას ემსახურებოდა ის", - განაცხადა ჩაფიძემ.
შეგახსენებთ, რომ ალექსანდრე გრიგოლაშვილი ლუგანსკის ოლქის ქალაქ სჩასტიესთან დაიღუპა. ცნობილია, რომ უკრაინელ მებრძოლთა ჯგუფი ჩასაფრებაში მოჰყვა, რის შედეგადაც ორი მებრძოლი დაიღუპა. გრიგოლაშვილი უკრაინაში რამდენიმე თვე იმყოფებოდა, იგი აიდარის სადაზვერვო ქვედანაყოფს მეთაურობდა.
თავდაცვის სამინისტრომ კი გამოაქვეყნა განცხადება, რომელშციც აღნიშნულია, "რომ ალექსანდრე გრიგოლაშვილის დაღუპვის გამო, სრული პასუხისმგებლობა ეკისრებათ ყოფილი ხელისუფლების წარმომადგენლებს, რომლებიც საქართველოს მოქალაქეებს მოუწოდებენ, მონაწილეობა მიიღონ ჩვენი ქვეყნის ფარგლებს გარეთ მიმდინარე საბრძოლო მოქმედებებში. თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას".
მასალის გამოყენების პირობები
