პოლიტოლოგი რამაზ საყვარელიძე ,,ჯი-ეიჩ-ენთან" საუბარში აცხადებს, რომ თავდაცვის უწყების განცხადება პოლიტიკურია, რაც ძალოვან სტრუქტურებს არ შეეფერება. თუმცა საყვარელიძე განმარტავს, რომ თავდაცვის უწყება ვერ წაახალისებს ქართველის სამხედროების იმ ნაბიჯს, რომლის ინიციატორი მით უმეტეს, ოპოზიციაა.
,,თავდაცვის სამინისტროს განცხადებამ დიდი ვნებათაღელვა გამოიწვია, მაგრამ შეიძლება ითქვას მას სხვა გზა არც ჰქონდა. თავდაცვის სამინისტრო ვერ წაახალისებს ქართველის სამხედროების ამ ნაბიჯს ისეთ პირობებში როდესაც ამის ინიციატორი ოპოციზიური პარტიაა, რაც ბადებს ეჭვს, რომ პროცესი შიდაპოლიტიკური მიზნისთვის იქნება გამოყენებული", _განაცხადა საყვარელიძემ.
კითხვაზე რამდენად სწორია ძალოვანმა უწყებამ მომხდარში პირდაპირ დაადანაშაულოს ყოფილი ხელისუფლება პასუხობს:
,,ეს პოლიტიკური განცხადებაა და პოლიტიკური განცხადება არ უხდება ძალოვან სტრუქტურებს ამაში გეთანხმებით. თუმცა ის, რომ თავდაცვის სამინისტრო ამ პროცესს ვერ გაამართლებს, ამ მხრივ მათი გაგება შეიძლება", _განაცხადა საყვარელიძემ ,,ჯი-ეიჩ-ენთან" საუბარში.
შეგახსენებთ, რომ ალექსანდრე გრიგოლაშვილი ლუგანსკის ოლქის ქალაქ სჩასტიესთან დაიღუპა. ცნობილია, რომ უკრაინელ მებრძოლთა ჯგუფი ჩასაფრებაში მოჰყვა, რის შედეგადაც ორი მებრძოლი დაიღუპა. გრიგოლაშვილი უკრაინაში რამდენიმე თვე იმყოფებოდა, იგი აიდარის სადაზვერვო ქვედანაყოფს მეთაურობდა.
თავდაცვის სამინისტრომ კი გამოაქვეყნა განცხადება, რომელშციც აღნიშნულია, "რომ ალექსანდრე გრიგოლაშვილის დაღუპვის გამო, სრული პასუხისმგებლობა ეკისრებათ ყოფილი ხელისუფლების წარმომადგენლებს, რომლებიც საქართველოს მოქალაქეებს მოუწოდებენ, მონაწილეობა მიიღონ ჩვენი ქვეყნის ფარგლებს გარეთ მიმდინარე საბრძოლო მოქმედებებში. თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას".
