იმედია ვინმემ თქვა, მაგალითად ასეთი - ჩვენ არა, დააჰაკერეს გვერდიო, - ასე ეხმიანება Facebook-ის საკუთარ გვერდზე საპარლამენტო უმრავლესობის წევრი თინა ხიდაშელი თავდაცვის სამინისტროს განცხადებას უკრაინაში ალექსანდრე გრიგოლაშვილის დაღუპვის თაობაზე.
"ვაპირებდი წინასაარჩევნო ტუნისიდან ამბავი მომეყოლა, თუმცა შემოვედი Facebook-ზე და რამ შემომახედა აქ?! იმედია, ვინმემ რამე თქვა, მაგალითად ასეთი - ჩვენ არა, დააჰაკერეს გვერდიო", - წერს ხიდაშელი.
თავდაცვის სამინისტრომ გამოაქვეყნა განცხადება, რომელშცი აღნიშნავს, "რომ ალექსანდრე გრიგოლაშვილის დაღუპვის გამო, სრული პასუხისმგებლობა ეკისრებათ ყოფილი ხელისუფლების წარმომადგენლებს, რომლებიც საქართველოს მოქალაქეებს მოუწოდებენ, მონაწილეობა მიიღონ ჩვენი ქვეყნის ფარგლებს გარეთ მიმდინარე საბრძოლო მოქმედებებში. თავდაცვის სამინისტროს მხრიდან არაერთხელ აღინიშნა, რომ მსგავსი მოწოდებები არის უპასუხისმგებლო და ემსახურება საქართველოს შეიარაღებული ძალების ყოფილი და მოქმედი სამხედრო მოსამსახურეების შეცდომაში შეყვანას".
