ირაკლი ალასანია გერმანიის ფედერაციული რესპუბლიკიდან საქართველოში დაბრუნდა. თავდაცვის მინისტრი საფრანგეთში სამუშაო და გერმანიაში ოფიციალური ვიზიტით იმყოფებოდა. ვიზიტის ფარგლებში, ირაკლი ალასანია თავის ფრანგ და გერმანელ კოლეგებს შეხვდა. თავდაცვის უწყების ხელმძღვანელმა საქართველოში დაბრუნების შემდეგ ვიზიტის მნიშვნელობა შეაფასა. „ჩვენი ქვეყნისთვის ეს ორი ვიზიტი საფრანგეთსა და გერმანიაში, იყო ძალიან მნიშვნელოვანი. გარდა იმისა, რომ ორმხრივ თანამშრომლობაში ახალი დინამიკაა, ჩვენ მივაღწიეთ გარკვეულ შეთანხმებებს საფრანგეში, მივაღწიეთ შეთანხმებებს სამხედრო ინდუსტრიასთან, რაც საქართველოს თავდაცვისუნარიანობას აამაღლებს. ეს იყო, როგორც თავდაცვის მინისტრის პირველი ოფიციალური ვიზიტი გერმანიაში. აქედან გამომდინარე, შეთანხმებები იქნება ძალიან დიდი სარგებლობის მომტანი ჩვენი თავდაცვისუნარიანობის ამაღლებისთვისაც, სამხედრო განათლების კუთხითაც და საქართველოს ნატოსთან სრული თავსებადობის მიღწევის კუთხით. ასე რომ, ორივე ვიზიტი შეიძლება შეფასდეს, როგორც წარმატებული ჩვენი მთავრობისთვის და ჩვენი ქვეყნისთვის" - განაცხადა საქართველოს თავდაცვის მინისტრმა ირაკლი ალასანიამ.
