საქართველოს შეიარაღებული ძალების ვაზიანის IV მექანიზირებული ბრიგადის სასროლეთზე სპორტული ღონისძიება გაიმართა. საქართველოში აკრედიტებული თავდაცვის ატაშეები და ელჩები ერთმანეთს ცეცხლსასროლი იარაღიდან სროლაში შეეჯიბრნენ. ტურნირში მონაწილეობა მიიღეს ასევე, ნატოს სამეკავშირეო ოფისის ხელმძღვანელმა უილიამ ლაჰიუმ და ნატოს სამხედრო მეკავშირე ოფიცერმა, პოლკოვნიკმა მაქსიმილიან ედერმა.
დიპლომატიური კორპუსის წარმომადგენლებს ვაზიანის სასროლეთზე თავდაცვის მინისტრის პირველმა მოადგილემ ირაკლი გეგეჭკორმა, ასევე გენერალური შტაბის უფროსის მოადგილეებმა, ბრიგადის გენერალმა ვლადიმერ ჩაჩიბაიამ და პოლკოვნიკმა რომან ჯოხაძემ უმასპინძლეს.
ტურნირის დაწყებამდე დიპლომატიური კორპუსის წარმომადგენლებს სასროლეთის უსაფრთხოების წესები გააცნეს. მონაწილეები ერთმანეთს მოიერიშე შაშხანა „M4" და „ბარაკის" ტიპის პისტოლეტიდან სროლაში შეეჯიბრნენ.
საუკეთესო მსროლელად ლატვიის თავდაცვის ატაშე, პოლკოვნიკი იანის დრეიმანისი დასახელდა. თავდაცვის მინისტრის მოადგილემ ირაკლი გეგეჭკორმა მას ჯილდოდ კომპანია „ზარაფხანას" სუვენირი „მეომარი" გადასცა. ტურნირის მეორე და მესამე ადგილები შვედეთის სამეფოს ელჩის მოადგილემ გუსტავ უინტრანდმა და აშშ-ის საზღვაო ფლოტის გადამდგარმა ოფიცერმა არტ მიშელმა დაიკავეს. მათ საჩუქრად კომპანია „ზარაფხანას" სუვენირი „დათა თუთაშხია" მიიღეს.
დღესვე, დიპლომატებმა სახმელეთო ძალების აღმოსავლეთ სარდლობისა და IV მექანიზირებული ბრიგადის სტრუქტურისა და ორგანიზაციის შესახებ პრეზენტაცია მოისმინეს. მათ ბრიგადის სამწყობრო მოედანზე საბრძოლო ტექნიკის დათვალიერების საშუალებაც მიეცათ.
შეჯიბრი დიპლომატებს შორის ცეცხლსასროლი იარაღიდან სროლაში საქართველოს თავდაცვის სამინისტროს ორგანიზებით გაიმართა.
