უკრაინის კონფლიქტი მთლიან რეგიონზე გავლენას მოახდენს, თუმცა რუსეთზე საქართველოს ეკონომიკის დამოკიდებულება მინიმალურია, აღნიშნულის შესახებ განცხადება საქართველოს ეროვნული ბანკის პრეზიდენტმა გიორგი ქადაგიძემ გააკეთა, რომელმაც ტელეკომპანია Bloomberg -ს ინტერვიუ მისცა.
Bloomberg -თან საუბრისას გიორგი ქადაგიძემ საქართველოს ეკონომიკური მდგომარეობა მიმოიხილა. ინტერვიუს დროს საუბარი შეეხო ასევე რუსეთის მიმართ დაწესებული სანქციების გავლენას საქართველოსა და რეგიონის ქვეყნებზე.
„ჩვენ ეს გზა 2006 წლის ემბარგოს შემდეგ გავიარეთ, როდესაც რუსეთი, საქართველოს ძირითადი სავაჭრო პარტნიორი, ერთ დღეს ის უბრალოდ გაქრა საქართველოს ექსპორტის სიიდან. ეს რთული იყო, მაგრამ დღეს ჩვენ უკეთეს სიტუაციაში ვართ, ვიდრე სხვა ამ რეგიონის ქვეყნები. რა თქმა უნდა უკრაინის კონფლიქტი გავლენას მოახდენს მთლიან რეგიონზე. საქართველოს ეკონომიკის რუსეთზე დამოკიდებულება საბედნიეროდ, მინიმალურია",- აღნიშნა გიორგი ქადაგიძემ.
