საქართველოს განათლებისა და მეცნიერების მინისტრის მოადგილემ ლია გიგაურმა ზოგად განათლებაში განხორციელებულ და დაგეგმილ სიახლეები მედიის წარმომადგენლებს გააცნო და აღნიშნა, რომ მეორე უცხო ენის სწავლება სავალდებულო მე-5 კლასიდან გახდება ნაცვლად მე-7-კლასისა.
,დასრულდა ეროვნული სასწავლო გეგმის დაწყებითი საფეხურის საგნობრივი სტანდარტის რევიზია, შესაბამისად, დაწყებითი საფეხურებისათვის ახალი სახელმძღვანელოები შეიქმნება;2014-2015 აკადემიური წლისათვის ეროვნულ სასწავლო გეგმაში უკვე განხორციელებულია დაგეგმილი ცვლილებების ნაწილი, მათ შორის: მეორე უცხო ენის სწავლება სავალდებულო გახდა მე-5 კლასიდან ნაცვლად მე-7-კლასისა, განისაზღვრა სადამრიგებლო საათის თემატიკა დაწყებით კლასებში, ის ორიენტირებული გახდა წიგნიერების დონის ამაღლებასა და ანალიტიკური აზროვნების განვითარებაზე. საბაზო საფეხურზე სადამრიგებლო საათი კარიერის დაგეგმვისა და პროფესიული ორიენტაციის უნარების განვითარებას დაეთმობა. სექტემბრიდან საშუალო საფეხურზე დაიწყება მეწარმეობის კურსის პილოტირება 100 საჯარო სკოლაში, აბიტურის საათის შინაარსის და მიმართულების არჩევის უფლება მიეცა სკოლას მოსწავლეების საჭიროებიდან გამომდინარე. სასწავლო გეგმის მიხედვით განისაზღვრა დამრიგებლის მშობელთან ურთიერთობის სავალდებულო ფორმატი და შინაარსი. აგრეთვე, ამოქმედდება მშობლების განათლების პროგრამა", -განაცახდა გიგაურმა.
მისივე განმარტებით, 2014 წლის სექტემბრიდან დაიწყება ეროვნული სასწავლო გეგმის დანერგვის მონიტორინგი საბაზო და საშუალო საფეხურებზე. როგორც გიგაურმა ჟურნალისტებთან განაცახდა გრძელდება საქართველოს მასშტაბით სასკოლო ინფრასტრუქტურის რეაბილიტაცია და ახალი სკოლების მშენებლობა.
,,ახალი სასწავლო წლისთვის სრულდება 400-მდე სკოლის სხვადასხვა სახის სარეაბილიტაციო სამუშაოები. ახალი სასწავლო წლისთვის დასრულდება ასევე 2 ახალი სკოლის მშენებლობა, 2014 წლის ბოლომდე 6 ახალი სკოლა შევა ექსპლუატაციაში, ხოლო სოფელ ლამბალოს საჯარო სკოლა, მისი მასშტაბურობიდან გამომდინარე (1000 ბავშვზე გათვლილი), 2015 წლის დასაწყისში დასრულდება. წელს დაიწყება 8 ახალი სკოლის მშენებლობა. აქტიურად მიმდინარეობს სკოლების აღჭურვა საჭირო ინვენტარით, 2014 წელს აღიჭურვება 1500-ზე მეტი სკოლა, ყველა პირველკლასელს და მათ დამრიგებლებს კომპიუტერები გადაეცემათ", _განაცახდა გიგაურმა.
