მიხეილ სააკაშვილმა პასუხი უნდა გასცეს კითხვებს, რომელსაც მას მოწმის სახით პროკურატურა დაუსვამს. ამის შესახებ „ჯი-ეიჩ-ენს" საქართველოს პარლამენტის წევრმა ოთარ ჩრდილელმა განუცხადა.
"დიახ, დაბარებულია მოქალაქე მიხეილ სააკაშვილი პროკურატურაში-მოწმის სტატუსით, ის წლების მანძილზე იყო ქვეყნის პირველი პირი და მთავარსარდალი. სავარაუდოდ, არსებობს მრავალი კითხვა, რომლებზეც მოქალაქე სააკაშვილი ვალდებულია პასუხი გასცეს, სამართლებრივ საკითხებთან მიმართებაში. კონკრეტულ კითხვებზე უნდა გაეცეს კონკრეტული პასუხი და არა, როგორც ჩვევია მას და მის გუნდს, რომ ყველაფერი სამართლებრივი ჭრილიდან გადაყავთ და აქცევენ პოლიტიკურ ჩარჩოში. რამდენადაც მახსოვს ერთხელ უკვე, მისთვის ჩვეული ლავირებით, მოქალაქე სააკაშვილმა სცადა პოლიტიკურად დევნილის მანტია მოეცვა და დაკითხვაზე არ ჩამოვიდა. სააკაშვილი, არც მაღალ პოლიტიკურ თანამდებობაზე ყოფნის დროს, გამოირჩეოდა კანონის დაცვითა და პატივისცემით და ახლაც, თავისი დესტრუქციული ქმედებებით ცდილობს, მაქსიმალური ზიანი მიაყენოს სახელმწიფოს", - განუცხადა „ჯი-ეიჩ-ენს" ჩრდილელმა.
მისი თქმით, სააკაშვილი, კარგად აცნობიერებს რა თავის მდგომარეობას-დემაგოგიური განცხადებებით, დისტანციურად ეწევა ტორპედირებას, სახელმწიფო ინსტიტუტებზე.
„კანონი ყველასათვის კანონია, ის დაბარებულია მოწმის სტატუსით და ამაში წესით მისთვის საზიანო არაფერი არ უნდა იყვეს და ამის გამო ის დამალობანას არ უნდა ეთამაშებოდეს პროკურატურას. თუმცა ბუნებით მფრთხალ და ტელეკამერებთან მოკეკლუცე, ,,ვაჟკაც,, სააკაშვილს პანიკური შიში აქვს, რომ მას საქართველოში დააპატიმრებენ. თუ მას დანაშაული დაუმტკიცდება, რა თქმა უნდა ის იქნება დაკავებული, შესაბამისი ორგანოების მიერ. ის სპეკულირებს მისი წარსული მაღალი პოლიტიკური თანამდებობით, თუმცა რამოდენიმე მაგალითს შევახსენებ, როდესაც დემოკრატიულმა ქვეყნებმა თავიანთ პრეზიდენტებს თუ პრემიერებს პასუხი აგებინეს კანონის წინაშე. მოგეხსენებათ, რომ არც თუ შორეულ წარსულში ისრაელმა და ხორვატიამ ყოფილი პრეზიდენტები დააკავა, ისევე როგორც საფრანგეთმა. სააკაშვილს მთელი თავისი მოღვაწეობის დროს ეგონა, რომ მხოლოდ უფლება გააჩნდა და არა მოვალეობა. მაგრამ მას, როგორც მოქალაქეს მოვალეობაც გააჩნია და ის ვალდებულია დაიცვას კანონი. ჩვენ ვაშენებთ ცივილურ სახელმწიფოს, რომელსაც აქვს ვალდებულება ქვეყნის მოქალაქეებთან და დასავლეთთან. ჩვენ, ვერანაირად ვერ დავყოფთ მოქალაქეებს კასტებად ან ვერ მივმართავთ სეგრეგაციას, რომ ვინ არის კანონთან მიმართებაში ხელშეუხებელი და ვინ არა. კანონის წინაშე, თანასწორი უფლება აქვს ყველა მოქალაქეს, ეს იქნება მოქმედი თუ ყოფილი პრეზიდენტი, ობივატელი თუ ნებისმიერი მაღალი თანამდებობის პირი...", - განაცხადა ჩრდილელმა.
შეგახსენებთ, რომ საქართველოს ყოფილი პრეზიდენტი Mმიხეილ სააკაშვილი მთავარ პროკურატურაში დაკითხვაზე უკვე მეორედ დაიბარეს. იგი საგამოძიებო უწყებაში, ხვალ, 28 ივლისს 11:00 საათზე უნდა გამოცხადდეს.
პროკურატურისგან შესაბამისი უწყისი სააკაშვილის დედამ გიული ალასანიამ მიიღო. უწყისში განმარტებულია, რომ ყოფილი პრეზიდენტი საგამოძიებო ორგანოში მოწმის სტატუსითაა დაბარებული.
