საქალაქო სასამართლოში რიყისა და ,,ტელეიმედის" გასხვისების საქმეზე პროკურატურის ერთ-ერთი მთავარი მოწმის ჯოზეფ კეის განცხადებით, თავდაცვის ყოფილმა მინისტრმა დავით კეზერაშვილმა უთხრა რომ ,,ტელეიმედი" უნდა დაეთმო. როგორც კეიმ განაცხადა იგი იძულებული გახდა ტელევიზია დაეთმო, რადგან მის სიცოცხლეს საფრთხე ემუქრებოდა.
„2008 წლის დეკემბერში დამირეკა დავით კეზერაშვილმა და დაუყოვნებლივ შეხვედრა მთხოვა მომაკითხა მისმა გამოგზავნილმა პირმა კოტე ყიფიანმა და მიმიყვანა მოსაშვილის ქუჩაზე, ოფისში, სადაც ოთახში გველოდებოდა კეზერაშვილი. კეზერაშვილმა მითხრა, რომ ტელევიზია უნდა დაგვითმოო, გადაწყვეტილება მიღებულიაო, გუდავაძეს შენს წინააღმდეგ შეაქვს სარჩელიო. ამის შემდეგ მომაწოდა ტელეფონი, ხაზზე იყო მიშა. მიშამ მითხრა, რომ „ტელევიზია უნდა დაგვითმო, ახლა ასეა საჭირო. შენ ჭკვიანი ადამიანი ხარ, დღემდე არაფერი შეგშლია, გააგრძელებ მოღვაწეობას, გექნება ის პატივი, რაც გქონდა და იქნები ჩვენი მეგობარიო". ამის შემდეგ ტელეფონი გათიშა", _განაცხადა კეიმ.
მისივე განცხადებით, კეზერაშვილი დაჰპირდა, რომ გიგი უგულავა დაურეკავდა და „ტელეიმედთან" დაკავშირებულ ხარჯებს აუნაზღაურებდნენ. თუმცა კეის თქმით, მას საბოლოოდ "ტელეიმედის" სანაცვლოდ 9 მლნ დოლარზე ნაკლები ჩაურიცხეს
შეგახსენებთ, რომ საქალაქო სასამართლოში რიყისა და ,,ტელეიმედის" გასხვისების საქმეზე პროკურატურის ერთ-ერთი მთავარი მოწმის, ბიზნესმენის, ჯოზეფ კეის დაკითხვა ,,სკაიპის" საშუალებით მიმდინარეობს.Kკეის დაკითხვა ნიუ-იორკიდან ხდება.
საქმეში ბრალდებულმა თბილისის ყოფილმა მერმა გიგი უგულავამ კი სხდომაზე აღნიშნა, რომ ხელისუფლება ჯოზეფ კეისთან შესულია გარიგებაში რუსთავის მეტალურგიულ ქარხანასთან დაკავშირებით.
თბილისის ყოფილ მერს გიგი უგულავას და თავდაცვის ყოფილ მინისტრს დავით კეზერაშვილს გამოძიება 2006 წელს რიყის ტერიტორიის და ,,ტელეიმედის" უკანონოდ გასხვისებას ედავება.აღნიშნულ ბრალდებას უარყოფს დაცვის მხარე და მას აბსურდულს უწოდებს.
