უკრაინელების 60 % დარწმუნებულია, რომ ქვეყნის აღმოსავლეთში ამჟამად მიმდინარე დაპირისპირებაში რუსეთის სპეცსამსახურები მონაწილეობენ. სოციოლოგიური გამოკითხვა ამ საკითხებზე ჯგუფმა „რეიტინგმა" ჩაატარა. ინფორმაციას ამის შესახებ უკრაინული მედია ავრცელებს.

„რესპოდენტთა ნახევარზე მეტი - 58 % დარწმუნებულია, რომ უკრაინის აღმოსავლეთ ნაწილში მიმდინარე დაპირისპირების უკან რუსეთის სპეცსამსახურები დგანან, 49 % კი მიიჩნევს, რომ ამის თანამონაწილე უკრაინის ყოფილი პრეზიდენტი ვიქტორ იანუკოვიჩია",- ნათქვამია გავრცელებულ ინფორმაციაში.
გამოკითხულთა მეოთხედი, ბრალს „რეგიოენების პარტიას" - 28 % და ადგილობრივ ოლიგარქებს 24 % აკისრებს.

ყოველი მეხუთე - 18 % მიიჩნევს, რომ ამაში ბრალი ახალი ხელისუფლების პოლიტიკით უკმაყოფილო ადგილობრივ მოსახლეობას მიუძღვის, 15 % რადიკალურ ნაციონალისტურ ორგანიზაცებს ადანაშაულებს, 11 % დასავლეთის სპეცსამსახურებს, ხოლო 6 % უკრაინის სპეცსამსახურებს.

გამოკითხულთა 58 % მიიჩნევს, რომ უკრაინამ მთლიანად უნდა დახუროს საზღვარი რუსეთთან. ამას 34 % არ ეთანხმება. თან, საზღვრის დახურვას მხარს ყველა რეგიონში უჭერენ სამხრეთის, ხაროკვისა და დონბასის გარდა.
ამასთან ერთად, გამოკითხულთა ნახევარი 49 % რუსეთთან სავიზო რეჟიმის შემოღებას უჭერს მხარს. ამის წინააღმდეგნი სამხრეთის, ხარკოვისა და დონბასის მცხოვრებლები არიან.