განათლების საერთაშორისო ცენტრის კონკურსში სამაგისტრო და სადოქტორო პროგრამებზე დაფინანსების მოპოვების მსურველთა შორის გამარჯვებულები გამოვლინდნენ. ცენტრის დაფინანსება 78-მა სტუდენტმა მოპოვა. გამარჯვებულთა შორის 49 მაგისტრანტი და 13 დოქტორანტია. ცენტრის დაფინანსება მოიპოვა შარშან გაცემული მიმდინარე გრანტის მფლობელმა 16 სტუდენტმაც.
სტიპენდიების განაწილებისას პრიორიტეტი საინჟინრო-ტექნოლოგიური, სოციალური, ზუსტი და საბუნებისმეტყველო მეცნეირებების მიმართულებას მიენიჭა. ასევე დაფინანსდა 5 კონკურსანტი სამართლის მიმართულებით, 5 ბიზნესის, 7 სახელოვნებო სფეროს, 2 ჯანდაცვისა, 1 კი, განათლების მიმართულებით.
კონკურსანტები განათლების საერთაშორისო ცენტრის კომისიამ აპლიკაციებისა და გასაუბრების მიხედვით შეარჩია. შეფასებისათვის კომისიამ იხელმძღვანელა წინასწარ დადგენილი კრიტერიუმებით, როგორიცაა აკადემიური მოსწრება, მოტივაცია, შერჩეული პროფესიისა და სასწავლებლის პრიორიტეტულობა და სხვა. კომისიის 10 წევრიდან თითოეული დამოუკიდებლად აფიქსირებდა საკუთარ შეფასებას ცალკეული აპლიკანტის მიმართ.
საბოლოოდ, აპლიკანტები რომელთაც ყველაზე მაღალი შეფასება დაიმსახურეს, სასწავლებლად სახელმწიფოს დაფინანსებით გაემგზავრებიან. სასწავლო პროგრამის დასრულებისა და საქართველოში დაბრუნების შემდგომ კი, სტუდენტები მიღებული ცოდნის რეალიზებას საჯარო სამსახურში შეძლებენ.
განათლების საერთაშორისო ცეტრის პროგრამაზე საბუთების მიღება 7 მაისიდან 7 ივნისამდე მიმდინარეობდა. კონკურსში მონაწილეობა შესაბამისი განათლების საფეხურზე მყოფ საქართველოს ნებისმიერ მოქალაქეს შეეძლო.
საგანმანათლებლო პროგრამების ფარგლებში ცენტრის ბაზაში 1 279 აპლიკანტი დარეგისტრირდა, რომელთაგან 514-მა კონკრეტული არჩევანი პროგრამების მიხედვით დააფიქსირა. გასაუბრებაზე პროგრამის 116 მონაწილე გავიდა.
განათლების საერთაშორისო ცენტრი პრემიერ-მინისტრის ინიციატივით შეიქმნა და მიზნად საერთაშორისო სტანდარტებისა და კვალიფიკაციის პროფესიონალების მომზადებას ისახავს. ცენტრი აფინანსებს მსოფლიოს წამყვან უნივერსიტეტებში სამაგისტრო და სადოქტორო პროგრამებზე სწავლას, საზღვარგარეთ მცხოვრები მეცნიერებისა და პრაქტიკოსების მოწვევას საქართველოში და საჯარო მოხელეთა კვალიფიკაციის ამაღლებისა და პროფესიული გადამზადების პროგრამებს.