პრეზიდენტის დეკრეტის თანახმად, რწმენის და აღმსარებლობის თავისუფლება არ არის შეზღუდული. შესაბამისად, ამ მომენტისთვის, რელიგიურ რიტუალში მონაწილეობა და აღმსარებლობა არის ამ უფლების ნაწილი, - განაცხადა საქართველოს პარლამენტის თავმჯდომარემ, არჩილ თალაკვაძემ.
მისი თქმით, სახელმწიფოს და ეკლესიას, რელიგიურ ორგანიზაციებს შორის არსებობს ძალიან კონსტრუქციული, ხანგრძლივი ურთიერთთანამშრომლობაზე დაფუძნებული ურთიერთობები.
„ჩვენ იმედი გვაქვს, რომ ამ პერიოდში, როდესაც მსოფლიოში არიც COVID-19-ის პანდემია და საქართველომ ეფექტურად მოახერხა ვირუსის გავრცელების შეკავება პირველ ეტაპზე, თუ კი ამის საჭიროება იქნება, იმედი გვაქვს, რომ მართლმადიდებელი ეკლესია და ყველა რელიგიური ორგანიზაცია მაქსიმალურად დაეხმარება სახელმწიფოს, რომ მოხდეს ვირუსის გავრცელების შეკავება და შემდგომი ღონისძიებების მიღება. პრეზიდენტის დეკრეტის თანახმად, რწმენის და აღმსარებლობის თავისუფლება არ არის შეზღუდული. შესაბამისად, ამ მომენტისთვის, რელიგიურ რიტუალში მონაწილეობა და აღმსარებლობა არის ამ უფლების ნაწილი.
ბატონ პრემიერს აქვს ჩვენი სრული მხარდაჭერა. მან თქვა, რომ, თუ ჩვენი მოქალაქეების ჯანმრთელობის და სიცოცხლის დაცვა და საზოგადოებრივი ჯანდაცვის შემდეგი ღონისძიებები აუცილებლად მოითხოვს ისეთი ღონისძიებების გატარებას, როგორიცაა კარანტინი ან სხვა უფლებების შეზღუდვა, ეს განხორციელდება დამატებითი დეკრეტით და პრემიერ-მინისტრს და მთავრობას ჩვენი სრული პოლიტიკური მხარდაჭერა ექნება”, - თქვა თალაკვაძემ.
