2019 წელს ევროპის რეკონსტრუქციისა და განვითარების ბანკმა (EBRD) საქართველოში 325 მილიონი დოლარის ოდენობის წლიური ინვესტიციით, რომელიც კერძო და საჯარო სექტორში განხორციელებულ 21 პროექტს მოხმარდა, ახალი რეკორდი დაამყარა. ეს ბანკისთვის ქვეყანაში ყველა დროის მაღალი მაჩვენებელია, რაც კიდევ უფრო აღრმავებს მის რელევანტურობას და გავლენას.
მოხარული ვარ იმ შედეგებით, რასაც წელს საქართველოში მივაღწიეთ. ეს არის ადგილობრივ ოფისში პროფესიონალთა ძლიერი გუნდის და ყველა ჩვენი პარტნიორის, ადგილობრივი მეწარმეებისა და საერთაშორისო დონორი ორგანიზაციების დამსახურება, რომლებიც ისწრაფვიან ხელი შეუწყონ საქართველოს ეკონომიკურ განვითარებას. ჩვენ უცვლელი მიზანია, ხელი შევუწყოთ ქვეყნის ნათელ მომავალს და გავაუმჯობესოთ ადამიანების ცხოვრება, - განაცხადა EBRD-ის რეგიონულმა დირექტორმა კავკასიაში, კატარინა ბიორლინ ჰანსენმა.
მუნიციპალური ინფრასტრუქტურის სექტორში, EBRD-იმ 2019 წელს საქართველოს დედაქალაქ თბილისისთვის დამატებით 200 ცალი თანამედროვე, დაბალძირიანი ავტობუსის, ასევე, ექვსი ქალაქისთვის - გორის, ქუთაისის, ფოთის, რუსთავის, თელავისა და ზუგდიდისთვის 175 ახალი ავტობუსის შეძენა დააფინანსა. ავტობუსები მგზავრებს მეტ კომფორტს შესთავაზებენ და ექნებათ მნიშვნელოვანი გარემოს დაცვის სარგებელი ევროკავშირის ემისიის და ჯანმრთელობისა და უსაფრთხოების სტანდარტების შესაბამისად.
ეს პროექტები შეესაბამება EBRD-ის ინოვაციურ კონცეფციას, სახელწოდებით „მწვანე ქალაქის ჩარჩო“, რომელიც გვთავაზობს კომპლექსურ, სისტემურ მიდგომას განვითარებადი ქალაქების გამოწვევების მოსაგვარებლად. ამის მთავარი მიზანია ჰაერის ხარისხის მდგრადობა და რესურსების ეფექტური გამოყენება.
EBRD-მა, იაპონიის მიერ დაფინანსებული ტექნიკური თანამშრომლობის პროგრამის ფარგლებში, 20 ქალი მძღოლი გადაამზადა. ბანკმა, ასევე, მხარი დაუჭირა თბილისის სატრანსპორტო კომპანიას გენდერული საკონსულტაციო მომსახურების პროგრამით.
ენერგეტიკის სექტორში, ბანკმა განაგრძო განახლებადი ენერგიის გამომუშავების მხარდაჭერა ენგურის ჰიდროელექტროსადგურის რეაბილიტაციის ინვესტირებით, ეფექტურობის გაზრდისა და ელექტროენერგიის მიწოდების უსაფრთხოების უზრუნველსაყოფად.
განსაკუთრებული ყურადღება დაეთმო განახლებადი ენერგიის სექტორში განხორციელებულ რეფორმებს, მთავრობასთან მუშაობას ენერგიის წყაროების ხელშეწყობისა და დივერსიფიკაციისთვის, ქვეყნის მზის შესაძლებლობების აუქციონის თაობაზე წამყვანი მოსამზადებელი სამუშაოების ჩატარებით.
EBRD–მა განაგრძო კერძო სექტორის მხარდაჭერა, როგორც ადგილობრივი პარტნიორი ბანკებისთვის საკრედიტო ხაზებით, ასევე, პირდაპირი სესხებით.
ბანკმა წარმატებით მოახდინა „ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ“ შეთანხმების საფუძველზე საკრედიტო ხაზებით მიღებული თანხების უტილიზაცია პარტნიორ ბანკებთან ერთად, ორ პარტნიორ ბანკთან გააფორმა დამატებითი DCFTA-ს საკრედიტო ხაზები. ევროკავშირის, როგორც გრანტის მომწოდებლის წყალობით, ადგილობრივი ბანკების მეშვეობით განხორციელებული ეს ქვესესხის ხაზები საწარმოებისთვის უზრუნველყოს ფინანსებს და საჭირო ექსპერტიზას, რაც ხელს უწყობს მათი პროდუქტისა და მომსახურების სტანდარტების მოდერნიზაციას ასოცირების შეთანხმების (AA) და DCFTA-ს მოთხოვნების შესაბამისად ევროკავშირთან ვაჭრობის გაძლიერების მიზნით.
EBRD–მა, სამ პარტნიორ ბანკთან სესხების გაფორმებით, ხელი შეუწყო მწვანე დაფინანსებას მწვანე ეკონომიკის დაფინანსების პროგრამის (GEFF) დაწყებით. ეს ახალი, ინოვაციური პროდუქტია, ენერგოეფექტურობის გასაძლიერებლად. ადგილობრივი პარტნიორი ბანკების მეშვეობით ქვესესხის გაცემის გზით, EBRD გააგრძელებს საწარმოებისა და ოჯახების მხარდაჭერას სამრეწველო და საცხოვრებელი ენერგოეფექტურობის გასაუმჯობესებლად.
EBRD–მა, ინვესტორთა საბჭოს მეშვეობით, განაგრძო საქართველოს ხელისუფლებასთან თანამშრომლობა პოლიტიკის ჩამოყალიბების გზით, საინვესტიციო კლიმატის გაუმჯობესებისა და რეფორმების ხელშეწყობის მიზნით.
EBRD-თან მჭიდრო თანამშრომლობის შედეგად, საქართველოს პარლამენტმა მიიღო საკანონმდებლო პაკეტი, რომელიც დაარეგულირებს ადგილობრივ ფინანსურ ბაზრებს და კაპიტალის ბაზრის კანონმდებლობაში ცვლილებების შეტანის პროცესს. ეს მნიშვნელოვანი ეტაპია საქართველოს კაპიტალის ბაზრის განვითარების თვალსაზრისით, რაც კომპანიებს საშუალებას აძლევს უსაფრთხოდ და ეფექტურად მოახდინონ თავისი რისკებისა და გავლენის ჰეჯირება.
დღემდე, EBRD-მა 249 პროექტით 4 მილიარდ დოლარზე მეტი ინვესტიცია განახორციელა საქართველოში.
