ევროპის უმსხვილესი დაბალბიუჯეტიანი ავიაკომპანიის Ryanair-ის საქართველოს ავიაბაზარზე შემოსვლა ქვეყანაში მეტი ევროპელი ტურისტის შემოსვლის წინაპირობა გახდება, მიიჩნევს ტურიზმის სექტორი. ტურისტული კომპანია „კავკასუს თრეველის“ დამფუძნებელი საბა კიკნაძე ამბობს, რომ Ryanair-ის შემოსვლით საქართველო ევროპისთვის კიდევ უფრო ხელმისაწვდომი გახდება. ამით კი ქვეყანაში შესაძლოა ე.წ. weekend ტურების განვითარება მოხდეს და შაბათ-კვირის გასატარებლად საქართველოში უფრო მეტი ადამიანი ჩამოვიდეს.
„საქართველოს ბაზარზე Ryanair-ის შემოსვლას ტურიზმის განვითარების მხრივ დიდი მნიშვნელობა აქვს და ეს ძალიან კარგია. Ryanair-ი ძირითადად ტურისტული მიმართულებით ასრულებს რეისებს და ავიაკომპანიის რუკაზე საქართველოს დატანა, ქვეყანას ევროპელი ტურისტების რაოდენობას კიდევ უფრო გაუზრდის“, აცხადებს კიკნაძე.
„კავკასუს თრეველის“ დამფუძნებელი განმარტავს, რომ კიდევ ერთი ავიაკომპანიის შემოსვლა ქვეყანაში, შესაბამისი ფასის სეგმენტის ტურისტებს საქართველოში ჩამოსვლას კიდევ გაუმარტივებს.
ტურისტული კომპანიის დამფუძნებელი მიიჩნევს, რომ აღმოსავლეთ ევროპიდან ჩამოსული ტურისტებით შესაძლოა რუსი ტურისტების ჩანაცვლებაც კი მოხდეს, რადგანაც აღმოსავლეთ ევროპის ახალგაზრდობა მოწადინებულია, რომ ახალ-ახალი ადგილები მოინახულოს და ამ მხრივ კი საქართველო მათთვის ძალიან ხელსაყრელი ტურისტული მიმართულებაა.
Ryanair-ის საქართველოს ბაზარზე შემოსვლასთან ერთად საბა კიკნაძე დადებითად აფასებს იმასაც, რომ კომპანია ოპერირებას განახორციელებს ქვეყნის უდიდეს აეროპორტშიც, რადგანაც დღემდე თბილისის საერთაშორისო აეროპორტში ევროპული "ლოუკოსტერები" ფრენებს არ ასრულებენ.