გია გაჩეჩილაძე საპარლამენტო უმრავლესობის და ფრაქციის სხდომებს პროტესტის ნიშნად აღარ დაესწრება
საქართველო, თბილისი - 2013-08-06 17:07:00აღნიშნული გადაწყეტილება გაჩეჩილაძემ დღეს პარლამენტში სიტყვით გამოსვლისას გამოაცხადა და განმარტა, რომ "ერთდაერთი მიზეზი, რის გამოც იგი კოალიცია „ქართულ ოცნებაში" რჩება, პრემიერ-მინისტრი ბიძინა ივანიშვილია".
ამასთან, გაჩეჩილაძის თქმით "მაშინ, როდესაც კოალიცია "ქართულ ოცნებას" ოქტომბრის საპრეზიდენტო არჩევნები აქვს მოსაგები, მას არ შეუძლია კოალიციიდან წასვლის თაობაზე გადადგმული ნაბიჯით ბიძინა ივანიშვილს უღალატოს".
გაჩეჩილაძის მიერ კოალიცია "ქართული ოცნების" შესაძლო დატოვების თაობაზე გაკეთებული განცხადება "მოქალაქეთა პოლიტიკური გაერთიანებების შესახებ" საქართველოს ორგანულ კანონში დაგეგმილ ცვლილებებს უკავშირდება, რომელიც პოლიტიკური პარტიების დაფინანსების წესს ეხება და "წვანეთა პარტიისთვის" დაფინანსების შეწყვეტას ითვალისწინებს.
როგორც მან "ჯი-ეიჩ-ენთან" საუბრისას აღნიშნა, „პოლიტიკური გადაწყვეტილებაა, რომ მის პარტიას და ასევე „სოციალ დემოკრატებს" ერთჯერადი დაფინანსება არ მიეღოთ".
"ყველაფერს ახლა კიდევ ვერ ვამბობ, მაგრამ დადგება დრო, როცა ამ ყველაფერს ღიად ვიტყვი. ამიტომ პროტესტის ნიშნად მე მივიღე გადაწყვეტილება, რომ აღარ დავესeრო ფრაქციის და უმრავლესობის სხდომას, ვისაც უნდა გამრიცხოს. პოლიტიკური გადაწყვეტილებაა, რომ დაფინასება ეძლევა 14 პოლიტიკურ სუბიექტს და პოლიტიკური გადაწყვეტილებაა ისიც, რომ გარეთ დარჩენილი, 0.1%-იანი რეიტინგის მქონე პარტიებსაც ერთჯერადი დახმარება ეძლევათ ბონუსის სახით. პოლიტიკური გადაწყვეტილების მეორე მხარე ის არის, რომ ამაში უმრავლესობის წევრი 2 პოლიტიკური ორგანიზაცია ვერ მოხვდა, რომელიც არჩევნების გზით მოვიდა პარლამენტში - "მწვანეთა პარტია" და "სოციალ-დემოკრატების" პარტია. ეს სამწუხარო ფაქტია, რაც თავიდან ბოლომდე მიანიშნებს იმ დამოკიდებულებაზე, რომელიც ჩვენ პარლამენტში გარკვეულ პოლიტიკურ სპექტრთან დაკავშირებით არსებობს. ნორმალური პოლიტიკური ორგანიზაცია ალბათ, მიიღებდა გადაწყვეტილებას, რომ ასეთი პოლიტიკური გადაწყვეტილების პირობებში დატოვოს ის გუნდი, რომელშიც ის ამდენი ხნის განმავლობაში მოღვაწეობს, მაგრამ სამწუხაროდ, იმიტომ რომ "მწვანეთა პარტიის" გასვლა უმრავლესობიდან ძალიან სერიოზულ პრობლემებს შეუქმნის სახელმწიფოს საგარეო არენაზე, განსაკუთრებით კი ევროპარლამენტში, ასევე იმიტომ, რომ ამ გუნდში წარმოდგენილი არიან ჩემთვის ძალიან საყვარელი და საპატივცემულო ადამიანები, მაგრამ განსაკუთრებით კი იმიტომ, რომ არსებობს ბიძინა ივანიშვილი, რომელსაც უდიდეს პატივს ვცემ, როგორც საზოგადო მოღვაწეს, არ შემიძლია, მას ვუღალატო. ამიტომ უმრავლესობის დატოვების შესახებ მე დღეს გადაწყვეტილებას ვერ ვიღებ, ყოველ შემთხვევაში, ვიდრე ბიძინა ივანიშვილია პოლიტიკაში, მაგრამ გადაწყვეტილებას ვიღებ, რომ არცერთ უმრავლესობის სხდომას, არცერთ ფრაქციის სხდომას მე პროტესტის ნიშნად არ დავესწრები, რადგან ასეთი დამოკიდებულება შეუძლებელია და თუ ვინმემ დაგეგმა ის, რომ "მწვანეთა პარტია", ან "სოციალ-დემოკრატთა" პარტია ამ ქვეყნიდან უნდა გაქრეს, ამას ვერავინ შეძლებს", - განაცხადა გია გაჩეჩილაძემ.