გიორგი სიგუა: სტალინი ეს არის ისტორიის ნაწილი და ტურისტული ატრაქციონი
საქართველო, თბილისი - 2013-08-02 16:01:00
„სტალინი ეს არის ისტორიის ნაწილი და ტურისტული ატრაქციონი", ასე შეაფასა ტურიზმის ეროვნული ადმინისტრაციის ხელმძღვანელმა, გორში სტალინის ძეგლის ხელმოერედ დადგმის გადაწყვეტილება. გიორგი სიგუას განმარტებით, გორი მსოფლიო მნიშვნელობის ტურისტული მიმართულება გახდება და ის არსებული ტურისტული ღირსშესანიშნაობების სანახავად ბევრი ტურისტი ჩამოვა. „სტალინიზმი საქართველოში 2012 წლის 1-ელ ოქტომბერს დასრულდა. სტალინიზმი იყო ამ ქვეყანაში როდესაც არსებობდა სსრკ და კიდევ 9 წლის განმავლობაში, „ნაციონალური მოძრაობის" მმართველობის დროს, როდესაც სტალინი - მიხეილ სააკაშვილი მართავდა ქვეყანას. ჩემთვის პირადად სტალინი, ეს არის ისტორიის ნაწილი და ტურისტული ატრაქციონი. რამდენიც არ უნდა ისაუბროს სააკაშვილმა და მისმა მომხრეებმა, აუცილებლად მივაღწევთ იმას, რომ გორი იქნება მსოფლიო მნიშვნელობის ტურისტული მიმართულება. მსოფლიოში მილიარდობით ადამიანი ცხოვრობს, რომელთათვის ეს ისტორიული პერსონაჟი მნიშვნელოვანი ფიგურაა. ჩვენ ამას გამოვიყენებთ ქვეყნის ეკონომიკური საკეთილდღეოდ და ამ გადაწყვეტილებას არანაირი კავშირი არ აქვს პოლიტიკასთან, სტალინიზმთან"- განაცხადა გიორგი სიგუამ.
„21-ე საუკუნეში სტალინის ძეგლის აღდგენა წარმოუდგენლად ბარბაროსული და ანტიქართული აქტია, ანტისახელმწიფოებრი და ანტიეროვნული ქმედება"- ასე შეაფასა საქართველოს პრეზიდენტმა მიხეილ სააკაშვილმა გორში, სტალინის ძეგლის აღდგენის გადაწყვეტილება.
„ჩვენ კარგად უნდა გვახსოვდეს როგორი იყო იოსებ სტალინი საქართველოსთვის.
1921 წელს, როდესაც სისხლისმსმელი ვლადიმერ ლენინიც კი წინააღმდეგი იყო საქართველოს დაპყრობის, იოსებ სტალინის დჟინებული გადაწყვეტილებით საქართველოში შემოვიდა მე-11 არმია და წერტილი დაუსვა საქართველოს დამოუკიდებლობას.
იოსებ სტალინმა საქართველოს ჩამოაჭრა ტერიტორიები - საუკეთესო ქართული მიწები, ქართული მოსახლეობით და გადასცა ის სხვა საბჭოთა რესპუბლიკებს.
იოსებ სტალინმა ხელოვნურად შექმნა ე.წ სამხრეთ ოსეთისა და აფხაზეთის ავტონომიები - ის ნაღმები, რომლებიც დამოუკიდებლობის მოპოვებასთან ერთად აგვიფეთქდა.
იოსებ სტალინმა დახვრიტა პოლონელ ოფიცრებთან ერთად კატინში ქართველი ოფიცრები, რომლებიც იბრძოდნენ ჯერ საქართველოს დამოუკიდებლობისთვის, შემდეგ კომუნიზმისა და ფაშიზმის წინააღმდეგ პოლონეთში.
სწორედ სტალინის ხელმოწერით დახვრიტეს ქართველები და პოლონელები კატინში!
სტალინის ბრძანებით განადგურდა საქართველოს ინტელიგენციის საუკეთესო ნაწილი!
იოსებ სტალინმა ჩაიდინდა წარმოუდგენელი დანაშაულები ქართველი ხალხის წინააღმდეგ...
21-ე საუკუნეში სტალინის ძეგლის აღდგენა - ეს არის წარმოუდგენელად ბარბაროსული და ანტიქართული აქტი, ანტისახელმწიფოებრი, ანტიეროვნული ქმედება, რომელიც აქცევს საქართველოს საერთაშორისო იზოლაციაში.
შეუძლებელია, მთელი დემოკრატიული სამყაროს დასაცინი არ გავხდეთ, მით უმეტეს, რომ მათი დასაცავები ვართ.
სტალინის ძეგლის აღდგენა გორში, ის ადგილი, რომელიც იბომბებოდა რუსების მიერ, არის იქ დაღუპული ქართველების, საკუთარი სახლებიდან გამოყრილი ადამიანების სულში ჩაფურთხება.
თუკი საქართველოში ვინმეს უნდა დაიჯეროს ბავშვური თამაში იმასთან დაკავშირებით, რომ, თითქოს, ის არ იღებს ამ გადაწყვეტილებებს, მისი პრობლემაა. პირადად მე ძალიან კარგად ვიცი, ვინ იღებს გადაწყვეტილებას ამ მთავრობაში.
მინდა მოვუწოდო საქართველოს პრემიერ-მინისტრს: გადახედოს ივანიშვილმა ამ ბრიყვულ გადაწყვეტილებას! ეს არ არის ის, რაც წაადგება საქართველოს საქმეს"- აღნიშნა სააკაშვილმა.