რუსეთი უკრაინაში თუ შეიჭრება, აშშ და გერმანია "ჩრდილოეთ ნაკადი 2"-ის შეჩერებაზე იმუშავებენ - ნედ პრაისი
საქართველო, თბილისი - 2022-01-27 13:06:00
შეერთებული შტატების ხელისუფლების წარმომადგენლები აცხადებენ, რომ უკრაინაში რუსეთის შეჭრა უარყოფითად აისახება გაზსადენ "ჩრდილოეთ ნაკადი -2"-ზე.
"ორ მეზობელ ქვეყნას შორის დაძაბულობის ესკალაცია მიგვიყვანს იქამდე, რომ პროექტი რეალიზებული არ იქნება", - განაცხადა სახელმწიფო დეპარტამენტის ოფიციალურმა წარმომადგენელმა ნედ პრაისმა საზოგადოებრივი რადიოს ეთერში.
"თუ რუსეთი უკრაინაში შეიჭრება, ჩვენ გერმანიასთან ერთად ვიმუშავებთ, რათა მივიღოთ აუცილებელი ზომები იმისთვის, რომ პროექტი წინ ვეღარ წავიდეს", - აღნიშნა პრაისმა.
ცოტა ხნის წინ ვაშინგტონმა სანქციები დაუწესა კომპანიებს, რომლებიც გაზსადენის მშენებლობაში მონაწილეობდნენ.
"ჩრდილოეთ ნაკადი 2"-ის მშენებლობა გასული წლის სექტემბერში დასრულდა.
ნოემბერში გერმანიის ფედერალურმა ქსელის სააგენტომ გაზსადენის სერთიფიკაციის პროცედურები შეაჩერა. სააგენტოს განცხადებით, სერთიფიცირება შესაძლებელი იქნება მხოლოდ მას შემდეგ, რაც "ჩრდილოეთ ნაკადი 2"-ის ოპერატორი წარადგენს დოკუმენტებს გერმანიაში კომპანიის შექმნის შესახებ, რომელიც დაკავებული იქნება "ჩრდილოეთ ნაკადი 2"-ის მართვით.