შეერთებულ შტატებში დაიწყო მასობრივი ვაქცინაციის პროგრამა
საქართველო, თბილისი - 2020-12-14 21:02:00
ამერიკული მედიის ცნობით, ორშაბათს შეერთებულ შტატებში დაიწყო კორონავირუსის საწინააღმდეგო მასობრივი ვაქცინაციის პროგრამა.
შტატების მთელ ტერიტორიაზე სპეციალური გადამზიდავი კონტეინერებით მიმდინარეობს ვაქცინის მილიონობით დოზის განაწილება.
როგორც იუწყებიან ორშაბათს Pfizer/BioNTech-ის ვაქცინას 150-მდე კლინიკა მიიღებს.
იმუნიზაციის პროგრამის მიზანია აპრილამდე 100 მლნ ადამიანის ვაქცინაცია.
აშშ-ის მოქმედი პრეზიდენტი დონალდ ტრამპი გამოეხმაურა ვაქცინაციის პროგრამის დაწყებას და ამერიკასა და მსოფლიოს მიულოცა ეს დღე.
"პირველი ვაქცინა გაკეთდა. ვულოცავ აშშ-ს! ვულოცავ მსოფლიოს!" - დაწერა დონალდ ტრამპმა Twitter-ზე.
First Vaccine Administered. Congratulations USA! Congratulations WORLD!
— Donald J. Trump (@realDonaldTrump) December 14, 2020
ამერიკის სურსათისა და წამლის ადმინისტრაციამ Pfizer/BioNTech-ის ვაქცინა გადაუდებელი მოხმარებისთვის პარასკევს დაამტკიცა.
შეერთებული შტატები გახდა მესამე ქვეყანა დიდი ბრიტანეთისა და კანადის შემდეგ, რომელიც გამოიყენებს Pfizer/BioNTech ვაქცინას მასობრივი იმუნიზაციისთვის.
Pfizer-ისა და BioNTech-ის მიერ შემუშავებული ვაქცინა უნდა ინახებოდეს –70 C ტემპერატურაზე.
პირველ ეტაპზე, ვაქცინას, ექიმები და რისკ ჯგუფში მყოფი ადამიანები მიიღებენ. სულ, ამერიკაში პირველ ეტაპზე 40 მილიონი დოზა ვაქცინა იქნება. რაც 20 მილიონის ვაქცინაციისთვის არის საკმარისი.
18 ნოემბერს Pfizer-მა და BioNTech-მა განაცხადეს, რომ მათ მიერ შემუშავებულმა ვაქცინამ 95%-იანი ეფექტურობა აჩვენა.
"ფაიზერის" ვაქცინის გამოყენება დიდმა ბრიტანეთმა 8 დეკემბრიდან დაიწყო.