საფრანგეთში იხვის ფერმაში ფრინველის გრიპი გავრცელდა
საქართველო, თბილისი - 2020-12-08 14:36:00
საფრანგეთის სოფლის მეურნეობის სამინისტროს ინფორმაციით, ქვეყნის სამხრეთ-დასავლეთით მდებარე იხვების ფერმაში დაფიქსრიდა ფრინველის გრიპის H5N8 შემთხვევები.
მათივე ინფორმაციით, ეს ამ წელს საფრანგეთში ფრინველის გრიპის პირველი შემთხვევაა.
გუშინ, ამ ფერმის ირგვლივ, სადაც 6 000 იხვი დაინფიცირდა H5N8 ტიპის ვირუსით, შეიქმნა უსაფრთხოების ზონა, რაც გულისხმობს დამატებით მონიტორინგს და სანიტარულ ზომებს.
როგორც Reuters-ი იუწყება, ევროპაში ფრინველის გრიპი სწრაფად ვრცელდება, რის გამოც ფრინველის ინდუსტრია მზადყოფნაშია, ვინაიდან გრიპის წინა აფეთქებებმა მილიონობით ფრინველის განადგურება გამოიწვია.
გავრცელებული ცნობით, H5N8 ტიპის ვირუსი ადამიანისთვის საფრთხეს არ წარმოადგენს.