რუსეთის პატრიარქი "Одноклассники"-ში დარეგისტრირდა
საქართველო, თბილისი - 2020-11-20 16:34:00
მოსკოვისა და სრულიად რუსის პატრიარქი კირილი რუსულ სოციალურ ქსელ "Одноклассники"-ში დარეგისტრირდა. ამის შესახებ ინფორმაციას მოსკოვის საპატრიარქო ავრცელებს.
საპატრიარქოს განცხადებით, პატრიარქის ოფიციალურ გვერდზე ხელმისაწვდომი იქნება მისი გამონათქვამები, ციტატები, ამონარიდები ქადაგეგებიდან და ვიდეოგამოსვლები.
"სოციალურ ქსელ "Одноклассники"-ში გამოჩნდა მოსკოვისა და სრულიად რუსის პატრიარქის კირილის ოფიციალური გვერდი. ანგარიშის გახსნა ემთხვევა რუსეთის მართლმადიდებელი ეკლესიის წინამძღვრის დაბადების დღეს, რომელიც დღეს 74 წლის ხდება", - ნათქვამია ოფიციალურ განცხადებაში.
მოსკოვის საპატრიარქოს საზოგადოებასთან ურთიერთობის სამსახურის უფროსის განცხადებით, პატრიარქის გვერდის შექმნა სოციალურ ქსელში "გახდება რუსეთის ეკლესიის წინამძღვრის მედიასივრცეში ყოფნის მნიშვნელოვანი ელემენტი".
მანამდე რუსეთის პატრიარქის ოფიციალური გვერდები გაიხსნა Facebook-სა და რუსულ სოციალურ ქსელ Vkontakte-ში.