რუმინეთის მმართველი კოალიცია დაიშალა
საქართველო, თბილისი - 2019-08-27 12:22:00
რუმინეთის კოალიციური მთავრობა დაიშალა, მას შემდეგ, რაც კოალიციაში შემავალმა ლიბერალ-დემოკრატიულმა პარტიამ მთავრობის შემადგენლობა დატოვა.
ლიბერალ-დემოკრატიული პარტიის ლიდერმა კელინ პოპესკუ-ტერიჩანუმ განაცხადა, რომ მას აღარ სურს სოციალ-დემოკრატებთან მუშაობა.
თავის მხრივ, რუმინეთის პრემიერ-მინისტრმა ვიორიკა დენჩილამ განაცხადა, რომ ის არ აპირებს თანამდებობის დატოვებას.
დენჩილეს თქმით, მისი პარტია [სოციალ-დემოკრატები] განაგრძობს ქვეყნის მართვას და იგი შეეცდება პარტნიორების მოპოვებას, რათა თავიდან იქნეს აცილებული რიგგარეშე საპარლამენტო არჩევნების ჩატარება.
რუმინეთის პარლამენტში სოციალ-დემოკრატებს 465 ადგილიდან 205 მანდატი აქვთ.
რუმინეთის მმართველი კოალიცია, რომელიც ლიბერალ-დემოკრატებისა და სოციალ-დემოკრატებისგან შედგებოდა, ქვეყანას 2016 წლიდან მართავდა.
ორ პარტიას შორის დაძაბულობა სოციალ-დემოკრატების მხრიდან პრეზიდენტობის კანდიდატად პრემიერ-მინისტრის ვიორიკა დენჩილას წარდგენას მოჰყვა.