საქართველოს პრეზიდენტმა მიხეილ სააკაშვილმა განათლების ყოფილი მინისტრის კახა ლომაიას ღვაწლი გაიხსენა და აღნიშნა, რომ ქვეყანაში წარმატებულად გატარებული განათლების რეფორმა, სწორედ ამ უკანასკნელის დამსახურებაა.
მისი თქმით, განათლების სფეროში პირველმა სწორედ ლომაიამ დაამკვიდრა სამართლიანობის სისტემა.
"ჩვენ გვყავდა კარგი განათლების მინისტრები. ძალიან ბევრი რამ გააკეთა ლომაიამ - მან დაამკვიდრა პირველად განათლებაში სამართლიანობის სისტემა და ესე იგი დაამკვიდრა საქართველოს მასშტაბით სამართლიანობის სისტემა. დღეს ყველამ იცის, რომ საქართველოში უმაღლეს სასწავლებლებში მიღებისას და კურსიდან კურზე გადასვლისას ხალხი არ იჩაგრება", - აღნიშნა პრეზიდენტმა.
სააკაშვილმა განათლების ახლანდელ მინისტრზე, დიმიტრი შაშკინზეც ისაუბრა.
"დღეს რასაც აკეთებს დიმა შაშკინი ეს არის ლომაიას სისტემის აგება და მისი მოდერნიზაცია. მთავარი დღეს მხოლოდ ის კი არ არის, რომ უსამართლობა არ არსებობს, არამედ მთავარია, რომ ამ სამართლიანობამ მოგვცეს ძალიან მაღალი ხარისხი - განათლების და ჩვენი მომავლის", - განაცხადა მიხეილ სააკაშვილმა.
