საქართველოს პრეზიდენტმა, მიხეილ სააკაშვილმა ქვეყანაში განათლების განვითარების კუთხით უცხო ენების შესწავლის მნიშვნელობაზე ბათუმში, ახლად რეაბილიტირებულ თურქულ სკოლა-ლიცეუმში ისაუბრა.
მისი თქმით, ქვეყნისათვის ძალზედ მნიშვნელოვანია, რომ 2010 წლიდან დაიწყო უცხო ენების მასწავლებლების ჩაყვანა საქართველოს პრაქტიკულად ყველა რაიონულ ცენტრსა და დიდ სოფელში.
"ჩვენ წლევანდელი წლიდან ჩამოგვყავს 1000-მდე ინგლისური ენის მასწავლებელი საქართველოს პრაქტიკულად ყველა რაიონულ ცენტრსა და დიდ სოფელში. ეს 1000 ახალგაზრდა არა მხოლოდ შემოიტანენ უცხო ენის სწავლებას საქართველოში, არამედ რეალურად, შემდეგ როცა წავლენ აქედან, იქნებიან ჩვენი ელჩები იმ ქვეყნებში, საიდანაც ისინი ჩამოვლენ. და ეს არის ძალიან მნიშვნელოვანი, იმიტომ, რომ ჩვენ უნდა ვიცოდეთ თურქული, ინგლისური, არაბული, სპარსული, გერმანული, და ფრანგული ენები, აუცილებლად უნდა შევინარჩუნოთ რუსული და ბევრი სხვა ენა", - განაცხადა მიხეილ სააკაშვილმა.