მაისში, ეკონომიკისა და მდგრადი განვითარების სამინისტროს ინიციატივით ეროვნული ბიზნეს დაჯილდოება "მერკური 2011" გაიმართება, რომელიც წლის საუკეთესო კომპანიებსა და მეწარმეებს გამოავლენს. ეკონოიკისა და მდგრადი განვითარების სამინისტროსთან ერთად აღნიშნული ბიზნესდაჯილდოების ინიციატორია ეროვნულ საინვესტიციო სააგენტოც, ხოლო გენერალური სპონსორია "HSBC-ბანკი საქართველო".
საქართველოს ეკონომიკისა და მდგრადი განვითარების მინისტრის, ვერა ქობალიას განცხადებით, ეროვნული ბიზნეს დაჯილდოების დაარსების მიზანია ქართული ბიზნესის წარმოჩენა, წახალისება და პოპულარიზაცია. იგი მოწოდებულია, ხელი შეუწყოს უკვე მიღწეული წარმატების მაგალითზე ადგილობრივი საქმიანი წრეების ახალ ინიციატივებს, ინოვაციურ გადაწყვეტილებებს, მათი საქმიანობის არეალის გაფართოებასა და განვითარებას. საქართველოს ეროვნული ბიზნეს დაჯილდოება - "მერკური" 2011
აერთიანებს როგორც მცირე და საშუალო, ასევე მსხვილ ბიზნესს.
მინისტრის განცხადებით, "მერკურის" მფლობელი იქნება საქართველოს მოსახლეობის ფავორიტი და ეს გამოარჩევს ამ დაჯილდოებას სხვა მსგავსი ღონისძიებისაგან, რომელიც საქართველოში იმართება.
""მერკური" იქნება ყველაზე პრესტიჟული ბიზნეს ჯილდო. ამის თქმის საშუალებას მაძლევს გამარჯვებულის გამოვლენის რთული და ამავე დროს გამჭვირვალე სისტემა, რომელიც მაქსიმალურად ობიექტური შედეგის საფუძველია. ამავე დროს, ეროვნული ბიზნეს დაჯილდოებისას გამარჯვებულებმა უნდა იცოდნენ, რომ "მერკური" მხოლოდ საუკეთესოებს გადაეცემათ," - განაცხადა საქართველოს ეკონომიკისა და მდგრადი განვითარების მინისტრმა ვერა ქობალიამ.
"ეროვნული ბიზნეს დაჯილდოების დაფუძნება შესანიშნავი ინიციატივაა და HSBC მისი აქტიური მხარდამჭერია. ასეთი ინიციატივები სტიმულირებას უწევს ინოვაციას და ზოგადად ბიზნესის განვითარებას. ბიზნესის ზრდისა და განვითარების მხარდაჭერა ჩვენი ერთ-ერთი ძირითადი პრინციპია და საქართველოში HSBC -ს სტრატეგიის მთავარი ამოცანაა. HSBC -ის რეკომენდაციით, შარშან ქართულ კომპანიებს პირველად მიეცათ საშუალება წარმოეჩინათ საკუთარი ქვეყანა პრესტიჟულ ევროპულ ბიზნესდაჯილდოებაზე,
რომელიც თავდაპირველად შექმნილი იყო ევროკავშირის ქვეყნებისთვის.
ჩვენ გვჯერა, რომ 2011 წელსაც ქართული ბიზნესი შეძლებს წარმოაჩინოს ზრდის, ეთიკისა და ინოვაციის მაგალითები როგორც ეროვნული, ასევე ევროპული მასშტაბით"- განაცხადა "HSBC ბანკი საქართველოს" გენერალურმა დირექტორმა გაი ლუისმა.
ეროვნული ბიზნეს დაჯილდოების ფარგლებში ნებისმიერ კომპანიას ეძლევა შესაძლებლობა წარადგინოს საკუთარი კანდიდატურა რამდენიმე ნომინაციაში. ნომინანტების წარდგენის უფლება ასევე აქვთ გადაწყვეტილების მიმღებ 200 პირსა და ექსპერტთა ჯგუფებს.
დაჯილდოების სააპლიკაციო ფორმების შევსება შესაძლებელია ეროვნული ბიზნეს დაჯილდოების ვებ გვერდზე www.mercuryaward.ge
ეროვნული ბიზნეს დაჯილდოების გამარჯვებული კომპანიების შერჩევის პროცესი წარიმართება ორ ეტაპად. პირველად დაჯილდოების ფარგლებში შემოსულ აპლიკაციებს განიხილავენ ექსპერტთა ჯგუფები და თითოეულ ნომინაციაში დაასახელებენ 5 საუკეთესო ნომინანტს. ჯამში შეირჩევა 50 წარმატებული ნომინანტი. მეორე ეტაპზე თითოეულ ნომინაციაში შერჩეულ ხუთ საუკეთესო ნომინანტს საშუალება მიეცემა წარსდგეს ეროვნული ბიზნეს დაჯილდოების კომისიის წინაშე და გააკეთოს საკუთარი ორგანიზაციის პრეზენტაცია. სწორედ პრეზენტაციის და შევსებულ სააპლიკაციო ფორმებზე დაყრდნობით მიიღებს კომისია საბოლოო გადაწყვეტილებას.
ეროვნულ ბიზნეს დაჯილდოებაში გამარჯვებულები გამოვლინდებიან შემდეგი კრიტერიუმების მიხედვით:
1. ფინანსური წარმატება;
2. ინოვაციური ხედვა;
3. განსაკუთრებული წვლილი დარგის განვითარებისათვის;
ეკონომიკისა და მდგრადი Gანვითარების სამინისტროს ინფორმაციით, ნებისმიერ კომპანიას შეუძლია წარადგინოს საკუთარი კანდიდატურა რამოდენიმე ნომინაციაში თუ იგი აკმაყოფილებს კონკრეტული ნომინაციის კრიტერიუმებს
1. წლის აღმოჩენა
ნომინაციაში გაიმარჯვებს, კომპანია ან ბრენდი (სავაჭრო/სასაქონლო ნიშანი), რომელიც 2010 წელს გამოჩნდა საქართველოს ბაზარზე და სწრაფად შეძლო მნიშვნელოვანი წარმატების მიღწევა ინოვაციური პროექტებისა და ინიციატივების ხარჯზე.
2. დარგის აღორძინება
ამ ნომინაციაში გაიმარჯვებს კომპანია, რომელმაც 2010 წელს წარმატებას მიაღწია ადრე ტრადიციულ, მაგრამ ამჟამად დასუსტებულ დარგში.
3. წლის აგრო ბიზნესი
ნომინაციაში გაიმარჯვებს კომპანია, რომელმაც 2010 წლის შედეგებით აგრობიზნესში მიაღწია მნიშვნელოვან წარმატებას, ახალი ტექნოლოგიების, ინოვაციური პროდუქტების ან პროცესების დანერგვის გზით.
4. მწვანე ბიზნესი
ნომინაციაში გაიმარჯვებს კომპანია, რომელმაც 2010 წლის შედეგებით მიაღწია მნიშვნელოვან წარმატებას მწვანე ტექნოლოგიების და პროდუქტების ან პროცესების დანერგვის გზით.
5. წლის ტურისტული ბიზნესი
ნომინაციაში გაიმარჯვებს კომპანია, რომელმაც 2010 წლის შედეგებით ტურიზმის განვითარების კუთხით მიაღწია მნიშვნელოვან წარმატებას, ახალი ტექნოლოგიების, ინოვაციური პროდუქტების ან პროცესების დანერვის გზით.
6. წლის ახალგაზრდა ბიზნესმენი
(დაწესებულია ასაკობრივი ზღვარი 35 წელი)
ნომინაციაში გაიმარჯვებს ახალგაზრდა მეწარმე, რომელმაც უკვე, 2010 წელს მნიშვნელოვან წარმატებას მიაღწია ბიზნესის სფეროში.
7. წლის მეწარმე ქალბატონი
ნომინაციაში გაიმარჯვებს 2010 წლის ყველაზე წარმატებული და თვალსაჩინო ქალბატონი ბიზნესის სფეროში.
8. ეკოლოგიურად სუფთა "ქართული პროდუქტი"
ნომინაციაში გაიმარჯვებს "ქართული პროდუქტი", რომელიც მზადდება ეკოლოგიურად სუფთა ინგრედიენტებისგან ან მის წარმოებაში გამოიყენება ისეთი ინოვაციური ტექნოლოგიები და პროცესები, რომლებიც არ აყენებენ ან ამცირებენ ზარალს გარემოზე.
9. უცხოეთის ვარსკვლავი - ახალი წარმატებული საექსპორტო პროდუქტი
ნომინაციაში გაიმარჯვებს საქართველოში დამზადებული საექსპორტო პროდუქტი, რომელმაც შეძლო გარე ბაზარზე მნიშვნელოვანი წარმატების მიღწევა და წარწერა "დამზადებულია საქართველოში" პოპულარული გახადა.
10. "დამზადებულია საქართველოში"
ნომინაციაში გაიმარჯვებს ინოვაციური ან მაღალტექნოლოგიური პროდუქტი, რომელმაც აამაღლა საქართველოს ტექნოლოგიური განვითარების ხარისხი და მნიშვნელოვანი სტატუსი შესძინა ბრენდს "დამზადებულია საქართველოში"
ეროვნული ბიზნეს დაჯილდოების ფარგლებში 50 საუკეთესო კანდიდატიდან ასევე გამოვლინდებიან გამარჯვებულები შემდეგ ნომინაციებში:
11. წლის ბიზნესი
ნომინაციაში გამარჯვებულის გამოვლენისას ეროვნული ბიზნეს დაჯილდოების მთავარი კრიტერიუმების პარალელურად ყურადღება მიექცევა კომპანიის სოციალურ პასუხისგებლობას
12. წლის მცირე ბიზნესი
ნომინაციაში გაიმარჯვებს მცირე ბიზნესის გამორჩეული წარმომადგენელი. შეირჩევა წარმატების, ინიციატივისა და ინოვაციის ყველაზე გამორჩეული მაგალითი, რომელმაც 2010 წელს მიაღწია განსაკუთრებულ წარმატებას ერთი ან რამდენიმე მიმართულებით.
ეკონომიკისა და მდგრადი განვითარების მინისტრის ვერა ქობალიას თქმით,
კატეგორიაში ხალხის რჩეული 2 ნომინაციაა წარდგენილი.
წლის მეწარმე
აღნიშნულ ნომინაციაში გადაწყვეტილების მიმღებ პირთა და ექსპერტთა მიერ დასახელებულ იქნება 10 გამორჩეული მეწარმე, რომელთაგან საუკეთესოს გამოავლენს მოსახლეობა ვებ გვერდზე ხმის მიცემის საშუალებით.
წლის სასურველი დამსაქმებელი
(სად ვიმუშავებდი)
ამ ნომინაციაში საკუთარი კანდიდატურის წარდგენა შეუძლია ნებისმიერ კომპანიას. ნომინაციაში გამარჯვებული გამოვლინდება დაჯილდოების ვებ-გვერდზე ხმის მიცემის საშუალებით. ხმის მიცემა შეუძლია ნებიმისერ პირს.
ხმის მიცემა დაიწყება 1 აპრილს ეროვნული ბიზნეს დაჯილდოების ვებგვერდზე: www.mercuryaward.ge მოსახლეობას საშუალება მიეცემა 25 აპრილამდე დააფიქსიროს საკუთარი არჩევანი.
პროექტის სპონსორები არიან "კავკასუს ონლაინი" და "ზარაფხანა". ღონისძიების მხარდამჭერებია "თელიანი ველი", "რუსთავი 2", "outdoor.ge" და გაზეთი "ჯორჯია თუდეი".