ეკონომიკისა და მდგრადი განვითარების სამინისტროში იმ კომპანიების "გაცხრილვა" მიმდინარეობს, რომლებმაც "საქართველოს ფოსტის" შეძენის სურვილი ოფიციალურად დააფიქსირეს.
ეკონომიკისა და მდგრადი განვითარების მინისტრი ამბობს, რომ იმ კომპანიებისგან რომლებმაც განაცხადი შემოიტანეს, უნდა დაზუსტდეს ფოსტის მიმართ თუ რა კონკრეტული ინტერესი აქვთ.
მინისტრის თმით საბოლოოდ შეირჩევა ის კომპანია, რომელსაც ფოსტის განვითარების ყველაზე საუკეთესო და დეტალური 5 წლიანი გეგმა ექნება.
"საბოლოოდ შერჩეული იქნება ის კომპანია რომელსაც 5 წლის განვითარების დეტალური გეგმა ექნება წარმოდგენილი. ჩვენ ისეთ კომპანიებთან გავაგრძელებთ საუბარს, რომელსაც დეტალურად ექნება დასაბურეთული ჩადებული ინვესტიციის უკან დაბრუნების საკითხი"- აცხადებს ეკონომიკისა და მდგრადი განვითარების მინისტრი.
"საქართველოს ფოსტის" შეძენით 15 კომპანია დაინტერესებული, რომელთაგან რამდენიმე ქართული და რამდენიმეც ევროპული და აზიური მსხვილი კომპანიებია.
შეგახსენებთ, რომ 15 იანვარს, ეკონომიკისა და მდგრადი განვითარების სამინისტროში, "საქართველოს ფოსტის" გასხვისებასთან დაკავშირებით, ინტერესთა მიღება შეწყდა.
ობიექტთან დაკავშირებით, ინვესტორთა განაცხადების მიღება სამინისტროს ჯერ კიდევ 2010 წლის 20 დეკემბერს უნდა შეეწყვიტა, თუმცა სამინისტროს ხელმძღვანელობის გადაწყვეტილებით ვადამ 2011 წლის 15 იანვრამდე გადაიწია.
"საქართველოს ფოსტის" აქციათა 100%-ის მფლობელი სახელმწიფოა და ის ქართულ საფოსტო ბაზარზე მთავარი საფოსტო ოპერატორია. კომპანია ოპერირებს მთელი ქვეყნის მასშტაბით და ფლობს დაახლოებით 87 000 კვ.მ.
მიწას და შენობებს საერთო ფართით 100 000 კვ.მ.
ეკონომიკისა და მდგრადი განვითარების სამინისტროს ინფორმაციით, კომპანიას აქვს ყველაზე სანდო საფოსტო მომსახურების გაწევის იმიჯი. მისი ოფისები მთელი ქვეყნის ტერიტორიაზეა განლაგებული.
სამინისტროში მიიჩნევენ, რომ ამ მახასიათებლების გათვალისწინებით შპს "საქართველოს ფოსტა" საუკეთესო ინვესტირების საშუალებას იძლევა.
საქართველოს მთავრობა მზადაა განიხილოს სხვადასხვა შემოთავაზება პოტენციური მყიდველების მხრიდან კომპანიის სამომავლო განვითარების შესახებ.