ზურაბ ნოღაიდელის "სამართლიანი საქართველოსთვის" მტკიცებით, მოძრაობამ მათ წინააღმდეგ აგორებული კამპანია" გაშიფრა. როგორც "ჯი-ეიჩ-ენს" მოძრაობა "სამართლიანი საქართველოსთვის" ოფისიდან აცნობეს, მათ მოიპოვეს უტყუარი ინფორმაცია, რომელიც ადასტურებს, რომ პარტიის წინააღმდეგ აგორებულ ერთ თვიან ბინძურ კამპანიას შინაგან საქმეთა მინისტრის ერთ-ერთი მოადგილე ხელმძღვანელობს, რომლის დავალებითაც კამპანიის შემსრულებლებმა უკვე შეადგინეს ყალბი რაიონული ორგანიზაციის კონფერენციების და ყრილობის ოქმები.
"ხელისუფლება ანგარიშს უწევს საერთაშორისო ორგანიზაციების მოსაზრებებს და ამიტომ ცდილობს ამ ბინძური კამპანიის იურიდიულად გამართლებას, რასაც, მათი აზრით, ეს ოქმები უზრუნველყოფს. მათთვის მთავარია ყრილობის დარბაზში იყოს ხალხი. იქნებიან თუ არა ისინი სინამდვილეში ამ მოძრაობის წევრები, ამას არანაირი მნიშვნელობა არ აქვს, რადგან, როგორც ზემოთ ხსენებული მინისტრის მოადგილე აცხადებს, მას მაინც შეუძლია იუსტიციის სამინისროში ამ ახლად გამომცხვარი მოძრაობის რეგისტრაცია", - ნათქვამია პარტიის განცხადებაში.
მოძრაობა "სამართლიანი საქართველოსთვის" კიდევ ერთხელ მოუწოდებს ხელისუფლებას "შეწყვიტოს ეს ბინძური კამპანია" და აფრთხილებს "ყველა თვითმარქვიას", რომ მის ხელთ არსებულ ინფორმაციებს საერთაშორისო ორგანიზაციებსა და დიპლომატიურ კორპუსს მიაწვდის.
