ბრიუსელში, ნატოს შტაბ-ბინაში ფინეთისა და შვედეთის გაწევრიანების პროტოკოლების ხელმოწერიდან რამდენიმე საათში, დანიამ ეროვნულ დონეზე უკვე მოახდინა ამ პროტოკოლის რატიფიცრება.
დანია პირველია ნატოს მოკავშირეთა შორის, რომელმაც პროტოკოლის რატიფირება მოახდინა.
"დანიამ უკვე მოახდინა შვედეთისა და ფინეთის პროტოკოლების რატიფიცირება. იმედი მაქვს, სხვა მოკავშირეებიც ასეთივე სისწრაფით მოახდენენ რატიფიცირებას", - დაწერა სოციალურ ქსელში დანიის საგარეო საქმეთა მინისტრმა იეპე კოფოდმა.
შვედეთის საგარეო საქმეთა მინისტრმა ენ ლინდემ უკვე გადაუხადა მადლობა დანიელ კოლეგას.
შეგახსენებთ, რამდენიმე საათის წინ, ბრიუსელში, ჩრდილოატლანტიკური ალიანსის შტაბ-ბინაში წევრი ქვეყნების ელჩებმა და ფინეთისა და შვედეთის საგარეო საქმეთა მინისტრებმა ნატო-ში გაწევრიანების პროტოკოლებს მოაწერეს ხელი.
პროტოკოლების ხელმოწერა გზას უხსნის ამ ორი ქვეყნის უდიდეს სამხედრო ალიანსი გაწევრიანების რატიფიცირების პროცესის დაწყებას.
ფინეთისა და შვედეთის ალიანსში გაწევრიანება საბოლოოდ დასრულდება მას შემდეგ, რაც წევრი ქვეყნების პარლამენტები პროტოკოლების რატიფიცირებას მოახდენენ. ამ პროცესს შესაძლოა ექვსიდან რვა თვემდე დასჭირდეს.
29 ივნისს ნატომ ოფიციალურად მიიწვია შვედეთი და ფინეთი ალიანსში გასაწევრიანებლად.
უკრაინაში რუსეთის მიერ გაჩარებული ომის ფონზე, შვედეთმა და ფინეთმა ნატოში გაწევრიანების განაცხადები ბრიუსელში 18 მაისს წარადგინეს. თავდაპირველად, თურქეთმა განცხადებების განხილვის პროცესი დაბლოკა, თუმცა მოგვიანებით ვეტო მოხსნა.