Tbilisi Pride ხელისუფლებას მიმართავს და მოითხოვს, პრაიდის კვირეულის ფარგლებში დაგეგმილი ღონისძიებების უსაფრთხოდ ჩატარება უზრუნველყოს.
ორგანიზაციამ, უსაფრთხოების მიზნებიდან გამომდინარეს, წელს უარი თქვა ღირსების მარშის ჩატარებაზე. მათი თქმით, ყველა დაგეგმილი ღონისძიება დახურულ სივრცეში გაიმართება.
"წელს ძალიან შეგნებულად და გააზრებულად მივიღეთ ძალიან მნიშვნელოვანი გადაწყვეტილება. საზოგადოების პოლარიზაციისა და განსაკუთრებით ევროინტეგრაციის პროცესში დაძაბულობის კერების თავიდან არიდების მიზნით, უარი ვთქვით კონსტიტუციით გარანტირებულ საჯარო შეკრებასა და მანიფესტაციაზე, არ ვატარებთ ღირსების მარშს, პრაიდკვირეულის ყველა ღონისძიება დახურულ სივრცეში ტარდება, თუმცა ამის მიუხედავად, პრორუსული და ძალადობრივი პარტია ალტ-ინფო, ღიად აცხადებს, რომ კვირეულს მაინც დაესხმევა თავს და გაიმეორებს 5 ივლისს. მოვითხოვთ, მთავრობამ საჯაროდ და მკაფიოდ განაცხადოს, რომ დაიცავს თბილისი პრაიდის კვირეულის სამივე ღონისძიებას და მისი თითოეული მონაწილის უსაფრთხოებას, ასევე უზრუნველყოს საჯარო წესრიგის დაცვა ღონისძიების მიმდებარე ტერიტორიებსა და მთელს ქალაქში. ჩვენი მეორე მოთხოვნაა, დაისაჯონ 5 ივლისის ძალადობრივი ქმედებების ორგანიზატორები, რომლებიც წელსაც ღიად აგრძელებენ ძალადობრივ მუქარებს და საფრთხეს უქმნიან ქვეყნის ევროპულ მომავალს", - აცხადებენ ორგანიზაციაში.
Tbilisi Pride-ის განცხადებით, მათ დაცვის პირობა მიიღეს შს სამინისტროსგან და უახლოეს მომავალში მოელიან უწყების საჯარო განცხადებასაც.
პრაიდის კვირეულის ფარგლებში ღონისძიებები 28 ივნისიდან 2 ივლისამდე გაიმართება.
"კონსერვატიული მოძრაობა" აცხადებს, რომ ყველა ღონეს მიმართავს ღონისძიებების ჩასაშლელად.
გასული წლის 5 ივლისს "ღირსების მარშის" ჩატარებას ხელი შეუშალეს ძალადობრივმა ჯგუფებმა.
5 ივლისს განვითარებული მოვლენებისას, ჟურნალისტებზე ჰომოფობიური თავდასხმისას, მედიის 50-ზე მეტი წარმომადგენელი დაშავდა. მათ შორის იყო „ტელეკომპანია პირველის“ ოპერატორი, ლექსო ლაშქარავა, რომელიც მასზე ძალადობიდან 6 დღეში გარდაიცვალა.
სამართალდამცველ ორგანოებს 5 ივლისის ძალადობის ორგანიზატორები ამ დრომდე არ გამოუვლენია.
