დიდი ბრიტანეთის პრემიერ-მინისტრის ადმინისტრაციამ დედოფალ ელისაბედ მეორეს ბოდიში მოუხადა პრინც ფილიპის დაკრძალვის წინა ღამეს დაუნინგ-სტრიტის 10-ში გამართული წვეულებისთვის.
წვეულების შესახებ ინფორმაცია მოიპოვა და გაავრცელა გამოცემა Daily Telegraph-მა. როგორც ირკვევა, დაუნინგ-სტრიტის 10-ში (პრემიერის ოფისი) 2021 წლის 16 აპრილს გაიმართა წვეულება, რომელიც გვიან ღამემდე გაგრძელდა. ამ წვეულებას ბორის ჯონსონი არ ესწრებოდა.
პრემიერ-მინისტრის პრესსპიკერის განცხადებით, სამწუხაროა, რომ წვეულება მაშინ გაიმართა, როდესაც პრინც ფილიპის გარდაცვალების გამო ქვეყანაში ეროვნული გლოვის დღეები იყო გამოცხადებული.
მისი თქმით, ბორის ჯონსონი აღიარებს, რომ პრემიერ-მინისტრის ოფისი უნდა მოქმედებდეს უმაღლესი სტანდარტებით და პასუხისმგებლობა აიღოს არასწორ ნაბიჯებზე.
ჟურნალისტების მიერ დასმული შეკითხვის საპასუხოდ, თუ რატომ მოიხადეს ბოდიში ადმინისტრაციის და არა პრემიერ-მინისტრის სახელით, სპიკერმა თქვა, რომ ბორის ჯონსონმა, როგორც პატიოსანმა ადამიანმა, უკვე აღიარა თავისი შეცდომა ამ რამდენიმე დღის წინ.
პარლამენტის ოპოზიციურმა პარტიებმა სწრაფად დაგმეს წვეულების გამართვა მაშინ, როდესაც მკაცრი შეზღუდვები გამო დედოფალი სრულიად მარტო გლოვობდა თავის მეუღლეს. წვეულების გამართვის დროს ბრიტანეთში მკაცრი შეზღუდვები იყო დაწესებული, აკრძალული იყო შენობაში ადამიანების შეკრება.
ეს არ არის პირველი შემთხვევა, როდესაც ბრიტანეთის პრემიერ-მინისტრი შეზღუდვების დროს წვეულების გამართვისთვის, კრიტიკის ქარცეცხლში გაეხვა.
ოთხშაბათს, ბორის ჯონსონმა, თემთა პალატაში სიტყვით გამოსვლისას, ბოდიში მოიხადა წვეულებაზე დასწრების გამო, რომელიც რეზიდენციის ბაღში, პანდემიის გამო დაწესებული მკაცრი ლოკდაუნის დროს გაიმართა.
საუბარია ბრიტანულ მედიაში გავრცელებულ ფოტოზე, რომელიც 2020 წლის 20 მაისს პრემიერ-მინისტრის ოფიციალური რეზიდენციის ბაღში გამართულ წვეულებას ასახავდა. როგორც გაირკვა, წვეულებაზე ადმინისტრაციის 100 თანამშრომელი იყო მიწვეული. დაესწრო მხოლოდ 30, მათ შორის ბორის ჯონსონი და მისი მეუღლე.
მაშინ ქვეყანაში, პანდემიის გამო, სოციალური ღონისძიებების გამართვა არ იყო ნებადართული. ადამიანებს სახლის დატოვება მხოლოდ განსაკუთრებულ შემთხვევებში შეეძლოთ. ლოკდაუნის პირობებში გამართულმა წვეულებამ ბრიტანელების განრისხება გამოიწვია.