ჩეხეთის საგარეო საქმეთა სამინისტროს გადაწყვეტილებით, პრაღაში რუსეთის საელჩოს შემადგენლობას მოსკოვში ჩეხეთის დიპლომატიური მისიის დონემდე შეამცირებს. ეს გადაწყვეტილება სავარაუდოდ რუსეთის საელჩოს 70-მდე თანამშრომლის გაძევებას გამოიწვევს.
"გუშინ მე ელჩს ვუთხარი, რომ თუ ჩეხ დიპლომატებს არ დააბრუნებენ მოსკოვში, ჩვენ შევამცირებთ საელჩოს შემადგენლობას პრაღაში. რადგან რუსულმა მხარემ არ უპასუხა ჩვენს მოთხოვნას, გადავწყვიტეთ დაიწყოს ამ გადაწყვეტილების განხორციელება", - განაცხადა ჩეხეთის საგარეო საქმეთა მინისტრმა, იაკუბ კულჰანეკმა.
მისივე თქმით, რუსეთის გაძევებულ მოქალაქეებს ჩეხეთის დატოვება მაისის ბოლომდე მოუწევთ.
რუსეთის საელჩოს პრაღაში ჰყავს 27 დიპლომატი და 67 ტექნიკური თანამშრომელი, ხოლო ჩეხეთის საელჩოს მოსკოვში ხუთი დიპლომატი და 19 ტექნიკური თანამშრომელი. შესაბამისად, პრაღის დატოვება 22-მა დიპლომატსა და 48 ტექნიკურ თანამშრომელს მოუწევს.
გასულ კვირას, ჩეხეთმა რუსეთის საელჩოს 18 თანამშრომელი გააძევა. ჩეხეთის მხარე დარწმუნებულია, რომ გაძევებული "დიპლომატები" მონაწილეობდნენ 2014 წელს ჩეხეთში მომხდარ საბრძოლო მასალების საცავის აფეთქებაში, რასაც ორი ადამიანი ემსხვერპლა. საპასუხოდ, რუსეთმა ქვეყნიდან 20 ჩეხი დიპლომატი გააძევა.