სომხეთის პრეზიდენტმა არმენ სარქსიანმა უკვე მეორეად არ მოაწერა ხელი პრემიერ-მინისტრ ნიკოლ ფაშინიანის განკარგულებას გენერალური შტაბის უფროსის, ონიკ გასპარიანის გადაყენების თაობაზე. ინფორმაციას სომხური მედია პრეზიდენტის ადმინისტრაციაზე დაყრდნობით ავრცელებს.
სომხური სააგენტო Armenpress-ის ცნობით, პარალელურად პრეზიდენტმა მიმართა საკონსტიტუციო სასამართლოს განკარგულების პროექტის კონსტიტუციასთან შესაბამისობის დასადგენად.
ნიკოლ ფაშინიანის პირველი მოთხოვნა ონიკ გასპარიანის გადაყენების შესახებ სომხეთის პრეზიდენტმა არ დააკმაყოფილა. პრეზიდენტის ადმინისტრაციამ ეს გადაწყვეტილება იმით განმარტა, რომ გენერალური შტაბის გადაყენების განკარგულების პროექტი კონსტიტუციასთან წინააღმდეგობაში მოდიოდა.
ნიკოლ ფაშინიანმა სომხეთის პრეზიდენტს გენერალური შტაბის უფროსის გადაწყენების მოთხოვნით მეორედ 28 თებერვალს მიმართა.
მეორედ მიმართვის შემთხვევაში, პრეზიდენტმა ხელი უნდა მოაწეროს განკარგულებას ან საკონსტიტუციო სასამართლოს მიმართოს. კონსტიტუციით დადგენილი ამ პროცედურების არშესრულების შემთხვევაში, განკარგულების აქტი პრეზიდენტის ხელმოწერის გარეშე შევა ძალაში.